نێچیرڤان بارزانی و سوودانی جەخت لە دووبارە هەناردەکردنەوەی نەوت دەکەنەوە

ئاڤا نیوز

 

سەرۆکی هەرێمی کوردستان و سەرۆکوەزیرانی عێراق جەخت لە پێویستی خێراکردنی دەستپێکردنەوەی کاری کۆمپانیا نەوتییەکان لە هەرێمی کوردستان بۆ دەستپێکردنەوەی بەرهەمهێنان و دووبارە هەناردەکردنەوەی نەوتی هەرێمی کوردستان لە ڕێگەی بەندەری جەیهان دەکەنەوە.

 

وێنە گەورەکە: بە مەبەستی دەستپێکردنەوەی هەناردەی نەوتی هەرێمی کوردستان و دیاریکردنی خەرجی بەرهەمهێنان و گواستنەوەی نەوت، ڕۆژی 2ی شوبات پەرلەمانی عێراق هەمواری یاسای بودجەی پەسەند کرد.

 

چیرۆکی سەرەکی: یەکشەممە 22-2-2025، محەممەد شیاع سوودانی، سەرۆکوەزیرانی عێراق پێشوازی لە نێچیرڤان بارزانی، سەرۆکی هەرێمی کوردستان کرد لە میانی کۆبوونەوەیەکدا تاوتوێی چەند تەوەرێک و بەدواداچوون بۆ جێبەجێکردنی کارنامەی حکومەت لە کەرت و بوارە جیاجیاکان کرا.

 

ڕاگەیێنراوی فەرمی: بەگوێرەی نووسینگەی سەرۆکوەزیرانی، سەرۆکوەزیرانی عێراق ئاماژەی بە گرنگیی بەردەوامبوون لە جێبەجێکردنی ڕێککەوتنە هاوبەشەکان کرد، بەتایبەتی لەبەر ڕۆشنایی پەسەندکردنی دوایین هەمواری یاسای بودجەی گشتیی فیدراڵی لەلایەن ئەنجوومەنی نوێنەران، بەشێوەیەک کە خزمەت بە بەرژەوەندی نیشتمانی بکات و ئابووری عێراق بەهێز بکات.

- جەخت لەسەر پێویستی خێراکردنی دەستپێکردنی کاری کۆمپانیا نەوتییەکان لە هەرێمی کوردستان بۆ دەستپێکردنەوەی بەرهەمهێنانی نەوت و دووبارە هەناردەکردنەوەی لە ڕێگەی بەندەری جەیهانەوە کرایەوە.