ئاڤا زانیاری لەبارەی ڕێککەوتننامەی پارتی و یەکێتی ئاشکرا دەکات

ئاڤا نیوز

پارتی و یەكێتی لەبارەی پێکهێنانی حکومەت لە دوایین کۆبوونەوەیاندا گفتوگۆیان لەبارەی 57 خاڵ کرد کە لەلایەن لیژنە تەکنیکییەکانەوە ئامادەکرابوون و کۆی سێکتەرەکان دەگرنەوە،  بەزووترین کات کۆبوونەوەیەکی دیکەش دەکرێت و دواتر لە کۆبوونەوەیەکی لووتکە ڕێککەوتنەکە واژۆ دەکرێت.

 

چیرۆکی سەرەکی: شاندی باڵای دانوستاندنكاری پارتی دیموكراتی كوردستان و یەكێتیی نیشتمانیی كوردستان ئەمڕۆ شەممە جارێکی دیکە لە شاری سلێمانی كۆبوونەوە و گفتوگۆیان لەبارەی ئەو ڕەشنووس و ڕاپۆرتە کرد كە لەلایەن لیژنە تەکنیکییەکانی هەردوولا ئامادە کرابوون، بڕیارە جارێکی دیکە کۆببنەوە و بڕیاری کۆتایی لەبارەی ڕەشنووسەکە بدەن.

زانیاریی تایبەت: ئاڤا زانیویەتی پارتی و یەکێتی لە ڕێککەوتنی کۆتایی نزیکن، لەسەر بنەمای یەک هەرێمی کوردستان، یەک حکومەت و یەک هێزی پێشمەرگە ڕەشنووسەکەیان داڕشتووە، کاتێک لەلایەن لیژنە تەکنیکییەکانەوە ئامادەکراوە 57 خاڵی لەخۆگرتووە، بەڵام گۆڕانکاری تێدا دەکرێت.

ڕاگەیێنراوی فەرمی: بەپێی ڕاگەیێنراوی هاوبەشی هەردوولا، کۆبوونەوەکە تایبەت بووە بە خستنەڕوو و گفتوگۆکردنی ڕاپۆرتی لیژنەی هاوبەشی هەردوولا کە بریتی بوو لە؛ تێڕوانینی سیاسی و کارگێڕی و هەنگاوەکانی پەیوەست بە پێکهێنانی کابینەی دەیەمی حکومەتی هەرێمی کوردستان و دامەزراوەکانی تر.

لەبارەی ناوەڕۆکی ڕاپۆرتەکە، سەرنج و تێبینی شاندی دانوستاندکاری هەردوولا خراوەتەڕوو و میکانیزمی گونجاو بۆ چۆنیەتی ڕێکخستنەوە و ڕێککەوتن لەسەر کۆی بابەتەکان قسەی لەسەر کراوە.

هەنگاوی داهاتوو: بڕیارە بەزووترین کات شاندی باڵای دانوستانکاری هەردوولا جارێکی دیکە کۆببنەوە بە ئامانجی یەکلاکردنەوەی ڕەشنووسی ڕێککەوتنەکە، دواتر کۆبوونەوەیەکی لووتکە لەنێوان پارتی و یەکێتی دەکرێت و ڕێککەوتنەکە پەسەند دەکرێت، هەرچەندە ڕێککەوتنەکە بۆ چوار ساڵ و کابینەی دەیەمی حکومەتی کوردستانە، بەڵام نزیک لە ڕێكکەوتنی ستراتیژی پێشتری نێوان هەردوولا دەبێت، دەبێتە بنەما بۆ ماوەیەکی درێژ.

لێدوانی فەرمی: یەکێک لە ئەندامانی شاندی دانوستانکاری پارتی بە ئاڤا میدیای ڕاگەیاند، لە کۆبوونەوەکەی ئەمڕۆ کات و شوێنی کۆبوونەوەی داهاتوو دیاری نەکرا، بەڵام لە کاتێکی نزیک دەکرێت.