پێکهاتەکان چاوەڕوانی پێکهێنانی کابینەی نوێ دەکەن و داواکارییان هەیە

ئاڤا نیوز

 

پێکهاتەکانی هەرێمی کوردستان چاوەڕوانی ڕێککەوتنی لایەنە براوەکانی هەڵبژاردن بۆ پێکهێنانی کابینەی نوێی حکومەت دەکەن، پەرلەمانتارێکی تورکمانیش دەڵێت، "داواکارین بەگوێرەی کورسییەکانمان مامەڵەمان لەگەڵ نەکرێت".

 

وێنە گەورەکە: پێکهاتەکانی هەرێمی کوردستان چاویان لە ڕێککەوتنی نێوان لایەنە براوەکانی هەڵبژاردنە، بۆ پێکهێنانی کابینەی نوێی حکومەت. هاوکات بەگوێرەی دوایین کۆبوونەوەی پارتی و یەکێتی کە ڕۆژی شەممە بەڕێوەچوو، ئەو دوو حیزبە لە ڕێککەوتنی کۆتایی نزیکن.

 

لێدوانی فەرمی: مونا قەهوەچی، ئەندامی خولی شەشەمی پەرلەمانی کوردستان لە پێکهاتەی تورکمان، بە ئاڤا میدیای ڕاگەیاند: بەرنامە و پرۆژە و داواکارییەکانمان ئامادە کردووە، چاوەڕوانی سەردانی لایەنەکانی پێکهێنەری حکومەت دەکەین، بۆ ئەوەی ڕادەستیان بکەین، چونکە بەشدارێکی کارای حکومەت دەبین.

 

زانیاریی زیاتر: پێکهاتەی تورکمان چاوی لە وەرگرتنی وەزارەتی ڕۆشنبیری و لاوانە، پێیانوایە لە ڕێی ئەم وەزارەتەوە دەتوانن کولتووری پێکەوە ژیان و شوناس و ئەدەبی پێکهاتە جیاوازییەکان بپارێزن.

 

زانیاریی تایبەت: ئەو پەرلەمانتارەی تورکمان خوازیارە بەگوێرەی کورسییەکانی پەرلەمان مامەڵەیان لەگەڵ نەکرێت، بەڵکو وەک پێکهاتەیەکی سەرەکی هەرێمی کوردستان مامەڵەیان بکرێت.

 

ئەمەش بزانە: لە هەرێمی کوردستان کولتوورێکی جوانی پێکەوە ژیانی نێوان پێکهاتە و ئایینە جیاوازەکان هەیە، حکومەتی هەرێمی کوردستانیش وەک خاڵێکی گرنگ لێی دەڕوانێت، هەر ئەمەش سەرنجی کۆمەڵگەی نێودەوڵەتی بەلای خۆیدا ڕاکێشاوە.