پاڵاوگەکانی تەسفیەی دوو لادەبرێن

 

ئاڤا نیوز

سەرجەم ئەو پاڵاوگانەی تەسفیەی دوویان دەکرد و لە ماوەی ڕابردوو داخراون، دەبێت لاببردرێن.

چیرۆکی سەرەکی: لەسەر بڕیاری سەرۆک وەزیران مەسرور بارزانی هەڵمەتێکی فراوانی داخستنی پاڵاوگە نایاساییەکان دەستی پێکرد و کارەکانی ئەو هەڵمەتە بەردەوامە.

لێدوانی فەرمی: ڕێبوار کەمال ئەندامی لیژنەی هاوبەشی داخستنی پاڵاوگە نایاساییەکان گوتی: ئەو پاڵاوگانەی تەسفیەی دوو دەکەن داخراون و خاوەنەکانیان ئاگادار کراونەتەوە کە دەبێت ئەو پاڵاوگانە لاببردرێن ، هەرکەسێک پابەند نەبێت ڕێکاری یاسایی لە بەرامبەر دەگیرێتەبەر.

زانیاری زیاتر: ئەمجەد سادق، نوێنەری قایمقامیەتی قەزای قوشتەپە بە ئاڤا میدیای گوت: لە سنووری قەزای قوشتەپە لە کۆی 35 پاڵاوگە 8 پاڵاوگەیان تەسفیەی دوویان دەکرد، هەر هەشتیان بەیەکجاری داخراون و دەبێت لاببردرێن، ئەوانی دیکەش چاودێری بەردەوامیان لەسەر دەبێت، هەر پاڵاوگەیەک پابەندی مەرجەکانی ژینگەپارێزی نەبێت ڕێگەی پێنادرێت کاربکات.

ئەوەی پێویستە بیزانیت: ئەو جۆرە پاڵاوگانە بە ڕێگەیەکی نازانستی و نایاسایی، کۆستیک و خۆڵ و تیزاب بەکاردەهێنن بۆ جیاکردنەوەی بەنزین و گازوایل لە نەوتی خاو ، پاشماوەکەشی کە بۆنێکی ناخۆش و خنکێنەری هەیە تێکەڵاوی خاک و هەوا دەبێت، ئەو بۆنە ناخۆشەی پێشتر لە چەند گەڕەکێکی هەولێر خەڵکی بێزار کردبوو هی ئەو پالاوگانە بوو.