ئاڤا وادەی ناردنی لیست و نوێترین زانیاری لەبارەی مووچەی مانگی دوو ئاشکرا دەکات

ئاڤا نیوز

دواجار لیستی مووچەی مانگی دوو ئامادەکرا و بڕیارە ئەم چوارشەممەیە بۆ بەغدا بنێردرێت، لەگەڵ گەیشتنی لیستەکەش وەزارەتی دارایی عێراق دەست بە هەنگاوەکانی خەرجکردنی پارە دەکات.

چیرۆکی سەرەکی: بەپێی ڕێککەوتنی هەولێر و بە‌غدا بڕیار بوو لیستی مووچەی مانگی یەک ببێتە بنەما بۆ کۆی مانگەکانی ئەمساڵ و ئیتر ئامادەکردنی لیستی مووچە هێندە کاتی نەوێت، بەڵام نەبووە بنەما بۆ مانگی دوو، ئەمەش بەهۆی بوونی هەندێک کێشە لە لیستەکەدا وەکو جیاواز ئامادەکردنی لیستی مووچەخۆرانی مەدەنی و سەربازی، لەگەڵ تۆمارنەکردنی ناوی بەشێکی فەرمانبەران لە لیستەکەدا بە سیستەمی پەیرۆڵ.

لێدوانی فەرمی: سەرچاوەیەکی باڵا لە حکومەتی هەرێمی کوردستان بە ئاڤا میدیای ڕاگەیاند:

٠ سەرجەم کێشەکان لە لیستی مووچەی مانگی دوو چارەسەر کراون،  یەک لیستی گشتگیر ئامادە کراوە.

٠ فەرمانبەرانی مەدەنی و سەربازی کە ژمارەیان نزیکەی 680 هەزار مووچەخۆرە کراونەتە یەک لیست بە مووچەخۆرانی زێرەڤانی و یەکەکانی حەفتا و هەشتاشەوە.

٠ ئەم چوارشەممەیە 26-2-2025، لیستی مووچە بۆ بەغدا دەنێردرێت.

٠ لیستەکە بە جۆرێک ئامادەکراوە لەجیاتی لیستی مووچەی مانگی یەک دەکرێتە بنەما بۆ کۆی مانگەکانی ئەمساڵ. 

٠ لیستی خانەنشینان بە جیا ئامادەکراوە و لەگەڵی هاوپێچ دەکرێت.

ئەمەش بزانە: لیستی مووچەی مانگی دوو لەلایەن فەرمانگەی تەکنەلۆژیای زانیاری بەسەرۆکایەتیی هیوا ئەفەندی سەرپەرشتی کراوە، کە دەزگایەکی گرنگی حکومەتی هەرێمی کوردستانە و تیمێکی تایبەت کاری لەسەر کردووە. 

ئەوەی پێشبینی دەکرێت: بەپێی ڕێککەوتنی هەولێر و بەغدا، لەدوای ناردنی لیستی مووچە، ڕاستەوخۆ وەزارەتی دارایی عێراق دەست بە هەنگاوەکانی خەرجکردنی مووچە دەکات و پێشبینی دەکرێت هەفتەی داهاتوو پارەی مووچەی مانگی دوو خەرج بکات.