ئەمریکا سزای نوێی بەسەر ئێراندا سەپاند

 

ئاڤا نیوز

ئەمریکا سزای بەسەر زیاتر لە 30 کەس و کەشتیی پەیوەست بە ئێرانەوە ڕاگەیاند کە لە نێویاندا سەرۆکی کۆمپانیای نیشتمانی نەوتی ئێرانیش هەیە کە بە هۆی دەڵاڵی فرۆشتن و ناردنی نەوتی ئێرانەوە بۆ دەرەوەی وڵاتەکە سزادراوە.

وێنە گەورەکە: لە چوارچێوەی فەرمانەکانی دۆناڵد ترەمپ سەرۆکی ئەمریکا بۆ سەپاندنی زۆرترین فشار لەسەر ئێران، ئەمریکا بەردەوامە لە سەپاندنی سزاکانی بەسەر چالاکییە ئابوورییەکانی ئێران بۆ ئامانجی کەمکردنەوەی توانا سەربازییەکانی.

لێدوانی فەرمی: سکۆت بێسێنت وەزیری گەنجینەی ئەمریکا ڕایگەیاند:

٠ ئێران بەردەوامە لە پشتبەستن بە تۆڕێکی سێبەری کەشتی و دەڵاڵەکان بۆ ئاسانکاری لە فرۆشتنی نەوت و دابینکردنی بودجەی چالاکییە ناسەقامگیرییەکانیان.

٠ ئەمریکا سوود لە هەموو ئامرازە بەردەستەکانی بۆ بەئامانجگرتنی هەموو لایەنەکانی زنجیرەی دابینکردنی نەوتی ئێران وەردەگرێت و هەرکەسێک مامەڵە لەگەڵ نەوتی ئێران بکات، ڕووبەڕووی مەترسی سزاکان دەبێتەوە.

زانیاری زیاتر: ئێرانیش هاوشێوەی ڕووسیا پشت بە تۆڕێک دەبەستێت کە گواستنەوەی نەوت لە دەرەوەی خاکەکانیان لە کەشتییەکەوە بۆ کەشتییەکی تر ئەنجام دەدەن بە مەبەستی خۆدزینەوە لە سزاکانی ڕۆژئاوا، ئەمەش سەرچاوەیەکی سەرەکی داهاتە بۆ وڵاتەکەنیان.