ئەندامانی ئەنجوومەنی پارێزگای بەسڕە لە داهاتی گشتی ملیۆنان دینار بۆ خۆیان تەرخان دەکەن

 

ئاڤا نیوز

ئەنجوومەنی پارێزگای بەسڕە لە باشووری عێراق، بە بڕیارێک و لە داهاتی گشتی دەیان ملیۆن دینار بەناوی "خەرجی سوتەمەنیی، میوانداریی و هاوکاریی" بۆ خۆیان تەرخان دەکەن، ئەوەش کاردانەوە و ناڕەزایی لێدەکەوێتەوە.

وێنە گەورەکە: ئەنجوومەنی پارێزگای بەسڕە لە 23 ئەندام پێکدێت، هاوپەیمانی تەسمیم کە کوتلەی ئەسعەد عیدانی پارێزگاری شارەکەیە لە ئەنجوومەنەکەدا زۆرینەیە و 12 ئەندامی هەیە.

نوسراوی فەرمی: خەڵەف بەدران، سەرۆکی ئەنجوومەنی پارێزگای بەسڕە لە نوسراوێکدا پاڵپشت بە بڕیاری ئەنجوومەنی پارێزگاکە، بڕیاریداوە کە بۆ سەرۆک واتە خۆیی لەگەڵ هەر ئەندامێکی ئەنجوومەنی پارێزگاکە بڕێک پارە خەرج بکرێت بەم شێوەیە:

٠ مانگانە ملیۆنێک دینار بۆ سوتەمەنی ئۆتۆمبێل.

٠ بۆ پێداویستییەکانی میوانداریی، مانگانە 700 هەزار دینار.

٠ بەمەبەستی هاوکاری هەژاران و ئەوانەی پێویستییان هەیە، مانگانە سێ ملیۆن دینار.

٠ هەموو سەرەتای ساڵێک سێ ملیۆن دینار و کۆتایی ساڵیش سێ ملیۆن دیناری دیکە وەک پاداشتی دارایی.

ئەوەی پێویستە بیزانیت: ئەندامانی ئەنجوومەنی پارێزگاکان لە عێراق کە بەشێوەی ڕاستەوخۆ لەلایەن خەڵکەوە هەڵدەبژێردرێن، مووچەکانیان بەگوێرەی بڕوانامە لە نێوان دوو بۆ سێ ملیۆن دینارە.

کاریگەریی و لێکەوتەکان: بڕیارەکە لە تۆڕە کۆمەڵایەتییەکان ناڕەزایی لێکەوتووەتەوە و وەک هەوڵێک بۆ بەهەدەردانی سامانی گشتی لەلایەن نوێنەرانی هەڵبژێردراوی خەڵکەوە ناو دەبرێت.