عێراق ساڵانە پێنج ملیار دۆلار زیانی پێدەگات

ئاڤا نیوز

بەهۆی قاچاخچێتی و سپیکردنەوەی پارەوە، عێراق ساڵانە نزیکەی پێنج ملیار دۆلار زیانی پێدەگات.

وێنە گەورەکە:  عێراق ساڵانێکە بەدەست گەندەڵی و قاچاخچێتی و سپیکردنەوەی پارەوە گرفتار بووە و بووەتە کۆسپ لەبەردەم بووژانەوەی ئابووری و گەشەکردنی وڵات لە سەرجەم سێکتەرەکان.

زانیاریی بەدەستهاتوو: بەگوێرەی پسپۆڕانی بوواری ئابووری، لە ئەنجامی سپیکردنەوەی پارە یان بەقاچاخ هێنانی کەلوپەل و شتومەک و خۆراک بەشێوەیەکی  نایاسایی، عێراق ساڵانە نزیکەی پێنج ملیار دۆلار زیانی پێدەگات.

ئەوەی پێویستە بیزانیت: بۆ هاوردەکردنی کاڵا و شتومەک و خۆراک، بانکی ناوەندیی عێراقی ڕۆژانە نزیکەی 250 ملیۆن دۆلار دەخاتە بازاڕەوە، لەو بڕەش  نزیکەی 230 ملیۆن دۆلاریان بە شێوەی حەواڵەیە و 20 ملیۆن دۆلاری دیکەش بە شێوەی نەختینەیە، بەمەش ساڵانە بانکی ناوەندی لەنێوان 70 بۆ 75 ملیار دۆلار دەخاتە بازاڕەوە.

ئەمەش بزانە: بەگوێرەی کەمترین ڕێژەی باج کە دەکاتە 10% لە داهاتی فەرمی گومرگی، دەبوایە زیاتر لە حەوت ملیار دۆلار ساڵانە بگەڕێنرایەتەوە خەزێنەی دەوڵەت، بەڵام ئێستا لە یەک ملیار و 500 ملیۆن دۆلار تێناپەڕێت.