یەکێتی زانایانی کوردستان لەبارەی زەکاتەوە ڕوونکردنەوە دەدات

ئاڤا نیوز

یەکێتی زانایانی کوردستان لەبارەی ناردنی زەکات بۆ دەرەوەی کوردستان ڕوونکردنەوە دەدات، وتەبێژی یەکێتی زانایانی کوردستانیش دەڵێت 'ئەنجوومەنی باڵای فەتوا بڕیاری لەوبارەیەوە داوە'.

وێنە گەورەکە: بەڕێوەبەرایەتیی گشتیی ئەوقاف و کاروباری ئاینی، نووسراوێکی ئاراستەی ئەنجوومەنی باڵای فەتوای سەر بە یەکێتی زانایانی ئاینی ئیسلامی کوردستان کردووە، لە نووسراوەکەدا پرسیاری خەڵکی لەبارەی ناردنە دەرەوەی زەکات بۆ وڵاتانی دیکەیان ئاراستە کردوون، دەپرسێت لەکاتێدا خەڵکێکی زۆر لە ناوخۆی کوردستان هەژارن، ئایا دروستە زەکات بنێردرێتە دەرەوە؟.

لێدوانی فەرمی: د.عەبدوڵڵا شێرکاوەیی، وتەبێژی یەکێتی زانایانی ئایینی ئیسلامی کوردستان بە ئاڤا میدیای ڕاگەیاند:

- ئەنجوومەنی باڵای فەتوا سەبارەت بەم پرسە کۆبووەوە و بڕیاری دا، کە بەهیچ شێوەیەک و بیانوویەک دروست نییە زەکات بنێردرێتە دەرەوەی کوردستان، چونکە لە ناوخۆی کوردستان خەڵکی هەژار هەیە و پێویستە زەکاتەکە بەوانە بدرێت.

- تەنیا لە یەک حاڵەتدا دەکرێت زەکات بنێردرێتە دەرەوەی کوردستان، ئەویش ئەو کاتەی کە خەڵکی هەژار لە ناوخۆی کوردستان نەمابێت.