ئاڤا بەدواداچوون بۆ بڕینی مووچەی خاوەن پێداویستییەکی تایبەت دەکات

ئاڤا نیوز

خاوەن پێداویستییەکی تایبەت ماوەی 11 ساڵە مووچەکەی بڕاوە، خێزاندارە و کرێچییە و سەرەڕای ئەوەی چەند جارێک لیژنەی کردووە، نە مووچەکەی خۆی گەڕاوەتەوە نە کچەکەی تۆمارکراوە.

چیرۆکی سەرەکی: ئارام سەیفەدین، گەنجێکی دانیشتووی هەولێرە و خاوەن پێداویستی تایبەتە، 75% ـی قاچەکانی لەکارکەوتوون، تاوەکو مانگی سێی 2014 کێشەی نەبووە و لەوکاتەوە دوای ئەوەی چاکسازی لە مووچەی خاوەن پێداویستییە تایبەتەکان کرا و مووچەی 12 هەزار و 600 کەس بڕا، لیژنەیەکی کردووە و مووچەکەی بڕاوە تاوەکو ئێستا چەند جارێکی دیکە لیژنەی کردووە، بەڵام مووچەکەی بۆ نەگەڕاوەتەوە.

زانیاریی زیاتر: ئەو گەنجەی شاری هەولێر کرێچییە و مانگانە 300 هەزار کرێ دەدات، بەدەر لەوەش کچێکی هەیە هەردوو دەستی 100% کەمئەندامە و چاوی ڕاستی نابینێت، هاوکات بەشێکی پەنجەکانی نییە، لیژنەیەکی کردووە و مووچە بۆ ئەویش نەبڕاوەتەوە.

زانیاریی تایبەت: ئاڤا بەدواداچوونی بۆ بابەتەکە کرد و داواکاریی ئەم خاوەن پێداویستییەی هەولێری گەیاندە یوسف چاوشین، بەڕێوەبەری گشتیی چاودێری و گەشەپێدانی کۆمەڵایەتی هەولێر، ئەویش وتی "ئارام و ئاریانی کچی دەتوانن دووبارە مامەڵەی خۆتۆمارکردن بکەنەوە و سەردانمان بکەن، دوای بڕیاری لیژنە دەتوانین تۆماریان بکەین و مووچەیان بۆ ببڕینەوە".