پەرلەمانی ئێران متمانەی لە وەزیری ئابووری وڵاتەکەی دەسەنێتەوە

ئاڤا نیوز

عەبدولناسر هیمەتی، وەزیری ئابووری ئێران دوای لێپرسینەوەی لە لایەن پەرلەمانی ئێرانەوە، دەنگی متمانەی پێ نەدرایەوە.

وێنە گەورەکە: قەیرانی ئابووری ئێران تا دێت زیاتر دەبێت، پەرلەمانتارانی ئەو وڵاتە وەزیری ئابووری بەرامبەر دۆخەکە بە کەمتەرخەم دەزانن و ئەمەش وایکرد متمانەی لێوەربگرنەوە.

چیرۆکی سەرەکی: دوای لێپرسینەوە لە وەزیری ئابووری کە شەش کاتژمێری خایاند، دەنگدان بۆ سەرلەنوێ متمانەبەخشین بە هیمەتی بەڕێوەچوو و لە دەنگدانێکی نهێنیدا 89 پەرلەمانتار بە دەنگی 'بەڵێ' و 182 پەرلەمانتار بە 'نەخێر' و یەک پەرلەمانتاریش دەنگی 'بێ لایەنی' بەکار هێنا و بەو شێوەیە، پەرلەمانی ئێران متمانەی لە وەزیری ئابووری وڵاتەکی سەندەوە.

لە لایەکی دیکەوە: مەسعوود پزیشکیان، سەرۆککۆماری ئێران سەبارەت بە خراپی دۆخی ئابووری وڵاتەکەی گوتی: ئێمە ئێستا لە جەنگ داین لەگەڵ ئەمریکا، دۆلارەکانمان لەلای وڵاتانی تورکیا، عێراق و قەتەر دەستی بەسەردا گیراوە و پێمان نادەنەوە، هۆکاری سەرەکی کێشەی ئابووری ئێران، دابەزینی نرخی تمەنی ئێرانی بەرامبەر بە دۆلاری ئەمریکی و  بەرزبوونەوەی نرخی کاڵاکانە.

ئەوەی لە بارەیەوە دەگوترێت: عەبدولناسر هیمەتی تۆمەتبار کراوە بە ناکارایی لەبەرامبەر بەرزبوونەوەی نرخی دۆلار بەرامبەر تومەن و زێڕ لە بازارەکانی ئێران کە تێکچوونی دۆخی ژیانی هاووڵاتیانی لێکەوتووەتەوە.