کێشەی شەش هەزار خێزان بۆ وەرگرتنی کارتی نیشتمانی چارەسەر دەکرێت

 

ئاڤا نیوز

شەش هەزار خێزان لە چاوەڕوانی پێدانی كارتی نیشتمانین و وەك خۆیان دەڵێن چوار ساڵە گرفتەكەیان چارەسەر نەكراوە.

وێنە گەورەکە: پێش ساڵی 2006 وەزارەتی ناوخۆی عێراق، چەند ساڵ جارێك لیژنەی لە بەغداوە ڕەوانە دەكرد كە هەركەسێك ناسنامە و ڕەگەزنامەی عێراقی نەبووبێت، بەڵام سەلمابێت كە عێراقیە یاخود لە دایك و باوكێكی عێراقی لەدایك بووە، ناسنامە و ڕەگەزنامەی بۆ دەركردووە، ئەوەش بە ڕەزامەندی و بەڵگە پشتڕاستكراوەكانی بەڕێوەبەرایەتییەكانی ڕەگەزنامەی گشتی پارێزگاكانی هەرێمی كوردستان. بەڵام ئەوانەی لەدوای ساڵی 2006ـەوە، ڕەگەزنامەیان پێدراوە، ئێستا بەغدا مامەڵەی دەرهێنانی كارتی نیشتمانییان بۆ ناكات، بە بیانووی ئەوەی دەسەڵاتی پێدانی رەگەزنامە لە 2006ـەوە لە رەگەزنامەی گشتی هەرێمی كوردستان وەرگیراوەتەوە و دەسەڵاتەكە تایبەت لەدەست عێراقە.

زانیاری بەدەستهاتوو: بەپێی زانیارییەكانی ئاڤا بۆ چارەسەرکردنی ئەو گرفتە لەسەر ئاستی هەردوو وەزارەتی ناوخۆی عێراق و هەرێمی كوردستان چەند جارێك باسكراوە.

زانیاریی زیاتر: رەگەزنامەی گشتی ئێستا سەرقاڵی كۆكردنەوەی زانیاریی هەموو ئەو كەسانەیە كە ئەو گرفتەیان هەیە، مامەڵەی سەرجەمیان بەیەك وەجبە رەوانەی فەرمانگەی ڕەگەزنامەی گشتی بەغدا دەکات بۆ ئەوەی لە سیستم داخیل بكرێن و دوای ئەوەش كارتی نیشتمانییان بۆ دەربهێنرێت.