وردبینیکردن لە لیستی مووچە گەیشتووەتە قۆناغی کۆتایی

 

ئاڤا نیوز

ئەمڕۆ دووشەممە لە وەزارەتی دارایی عێراق وردبینیکردن لە لسیتی مووچەی مانگی دوو بەردەوام بووە و گەیشتووەتە قۆناغی کۆتایی. 

چیرۆکی سەرەکی: شاندی تەکنیکی وەزارەتی دارایی و ئابووریی هەرێمی کوردستان ماوەی چەند ڕۆژێکە لە بەغدایە و هێشتا نەگەڕاوەتەوە. کاریان تەواوکردنی ڕێکارەکانی ناردنی مووچەی مانگی دوو و وەڵامدانەوەی پرسیارەکانی وەزارەتی دارایی عێراقە لەبارەی لیستی مووچە.

زانیاریی بەدەستهاتوو: بەپێی زانیارییەکانی ئاڤا، بە ئەگەرێکی زۆرەوە ئەگەر هیچ نەیەتە پێشەوە سبەی سێشەممە وردبینیکردن تەواو دەبێت و دواتر دەست بە ڕێکارەکانی ناردنی پارە دەکرێت.

زانیاریی زیاتر: ئەنجامی وردبینییەکان دەدرێتە دەست تەیف سامی، وەزیری دارایی عێراق، ئەویش واژۆی لەسەر دەکات و نووسراوە فەرمییەکان بۆ بانکی ناوەندیی عێراق دەکات بۆ خەرجکردنی پارە. حەوت جۆری نووسراویش دەکات بۆ خەرجکردنی مووچەی سەرجەم توێژەکان، لەوانە: فەرمانبەرانی مەدەنی، مووچەخۆرانی سەربازی، خانەنشینان، چاودێری کۆمەڵایەتی و توێژەکانی دیکە.

ئەندامێکی تیمی تەکنیکی کوردستان بە ئاڤای وت، ئەم هەفتەیە پارەی مووچەی مانگی دوو بۆ هەرێمی کوردستان دەنێردرێت، بەپێی رێککەوتنی هەولێر و بەغداش بڕەکەی لەنێوان 950 ملیار بۆ تریلۆنێک دینار دەبێت.

لە لایەکی دیکەوە: دوێنێ یەکشەممە تیمێکی دیکەی وەزارەتی دارایی و ئابووریی هەرێمی کوردستان چوونەتە بەغدا، بۆ وەڵامدانەوەی ئەو پرسیارانەی لەلایەن تیمی ژمێرکاری وەزارەتی دارایی عێراق دروست ببوون لەسەر لیستی مووچە.