پڕۆژەکەی میسر: 53 ملیار دۆلار بۆ ئاوەدانکردنەوەی غەززە تەرخان بکرێت

ئاڤا نیوز

 

لووتکەی نائاسایی وڵاتانی عەرەبی لە قاهیرە کۆتاییهات و تیایدا لوتکەکە پشتیووانی خۆی بۆ پڕۆژەی میسر تایبەت بە ئاوەدانکردنەوەی غەززە دەربڕی، کە 53 ملیار دۆلاری پێویستە و پێنج ساڵیش دەخایەنێت.

 

وێنە گەورەکە: ڕۆژی سێشەممە بە بەشداری سکرتێری گشتیی نەتەوەیەکگرتووەکان، لوتکەی نائاسایی عەرەبی بەڕێوەچوو و تیایدا پێشنیازەکەی ترەمپ بۆ چۆڵکردنی غەززە ڕەتکرایەوە.

 

ڕاگەیێنراوی فەرمی: لە ڕاگەیێنراوی کۆتایی لوتکەی عەرەبیدا بڕیاردرا پڕۆژەکەی میسر ببێتە پڕۆژەی هاوبەشی وڵاتانی عەرەبی تایبەت بە ئاوەدانکردنەوەی غەززە و دۆزی فەڵەستین.

 

ئەوەی پێویستە بیزانیت: پڕۆژەکەی میسر و لوتکەی عەرەبی:

 

- پارێزگاری لە مافی خەڵکی فەڵەستین دەکەین بۆ مانەوەی لەسەر خاکەکەی.

- لیژنەیەک لە کەسانی فەڵەستینی بێلایەن بۆ بەڕێوەبردنی غەززە لە قۆناغی ڕاگوزەر پێکدەهێنرێت کە ماوەکەی شەش مانگە.

- لەو ماوەیەدا شوێنی نیشتەجێبوونی کاتی بۆ ملیۆنێک و 500 هەزار ئاوارە دروست بکرێت.

- ئاوەدانکردنەوەی غەززە 53 ملیار دۆلار و پێنج ساڵ دەخایەنێت.

- لە دوو ساڵی یەکەمدا 200 هەزار یەکەی نیشتەجێبوون دروست بکرێت.

 

زانیاریی زیاتر: هەر لە پرۆژەکەی میسردا هاتووە، قۆناغی یەکەم 20 ملیار دۆلاری پێویستە، قۆناغی دووەمییش 30 ملیار دۆلاری دەوێت کە دروستکردنی 200  هەزار یەکەی نیشتەجێبوونی دیکە و فڕۆکەخانەی غەززە لەخۆدەگرێت، لەگەڵ دروستکردنی بەندەری بازرگانیی و ناوەندی تەکنەلۆژیی و هۆتێل لە نزیک کەناراوەکانی غەززە.

 

لەلایەکی دیکەوە: بەگوێرەی پلانەکە، وادەی دەستپێکردنی ئاوەدانکردنەوەی غەززە پەیوەستە بەو پارەیەی بۆی دابین دەکرێت، داوا لە ئەنجوومەنی ئاسایش دەکرێت هێزی ئاشتیپارێز لە غەززە و کەناری ڕۆژئاوا جێگیر بکات.