کارکردن لە پرۆژەی جووتسایدی ڕێگای نێوان هەولێر - کۆیە خێرا دەکرێت

 

ئاڤا نیوز

پرۆژەی جووتسایدی هەولێر – کۆیە، شاڕێگای بەستنەوەی ئەو دوو ناوچەیە و کارئاسانی نێوان دوو پارێزگایە ماوەی دوو مانگە کارکردن تێیدا بەردەوامە و پرۆسەکە خێراتر دەکرێت.

چیرۆکی سەرەکی: 14 ساڵ لەمەوپێش بەردی بناغەی پرۆژەی جووتسایدکردنی ڕێگای نێوان هەولێر - کۆیە دانرا و پرۆژەکە تەواو نەکراوە، لە ماوەی ڕابردوو سەرۆکوەزیران مەسرور بارزانی، دووبارە بەردی بناغەکەی دانا و کارکردن تێیدا بەردەوامە، ڕێگاکە وەک هۆکارێکی گرنگی بازرگانی لە نێوان سلێمانی و هەولێر دادەنرێت.

لێدوانی فەرمی: خەتاب قادر، بەڕێوەبەری ڕێگاوبانی هەولێر بە ئاڤای گوت، "تاوەکو ئێستا 3%ـی پرۆژەکە تەواوبووە و ئیمکانیاتی دارایی زیاتر دەکرێت، کارکردن تێیدا خێراتر دەبێت و پێش وادەی دیاریکراوی خۆی تەواو دەبێت".

ئەمەش بزانە: بە گوژمەی 560 ملیار 433 ملیۆن و 225 هەزار دینار، پرۆژەی جووتسایدی هەولێر – کۆیە بەردەوامە، کە پڕۆژەیەکى ستراتیژى گرنگى سنوورى شارى هەولێرە و درێژیەكەی نزیكەی 40 كیلۆمەترە، بەگوێرەی گرێبەستی کۆمپانیاکە دەبێت لە ماوەی هەزار و 275 ڕۆژدا تەواو بکرێت.