ئەمریکا دژایەتی پلانی میسر بۆ ئاوەدانکردنەوەی غەززە دەکات

ئاڤا نیوز

 

کۆشکی سپی دژایەتی پلانی وڵاتانی عەرەب سەبارەت بە کەرتی غەززە دەکات و جەخت لە پێشنیازەکەی ترەمپ بۆ ئاوەدانکردنەوەی غەززە دەکاتەوە.

 

چی ڕوودەدات: دوای ئەوەی لە 25-1-2-2025، دۆناڵد ترەمپ، سەرۆکی ئەمریکا پلانی ڕاگواستنی فەلەستینیەکانی لە غەززەوە بۆ وڵاتانی دراوسێی وەک میسر و ئوردن خستەڕوو، ئەم پلانەش لەلایەن هەردوو وڵاتەوە ڕەتکرایەوە، بۆ ئەم مەبەستەش ڕۆژی سێشەممە 4-3-2025  سەرکردەی وڵاتانی عەرەبی لە قاهیرە بۆ تاتووێکردنی پلانی ئاوەدانکردنەوەی غەززە کۆبوونەوە. لە بەیاننامەیەکی نووسراودا وتەبێژی ئەنجوومەنی ئاسایشی نیشتمانی کۆشکی سپی سەرنج دەخاتە سەر  دەرئەنجامەکانی لووتکەکە و ڕەخنەی لێدەگرێت.

 

ڕاگەیێنراوی فەرمی: برایان هیوز، وتەبێژی ئەنجوومەنی ئاسایشی نیشتمانیی کۆشکی سپی ڕایگەیاند، غەززە ئێستا شوێنێکە ناتوانرێت تیایدا ژیان بکرێت، فەلەستینییەکان ناتوانن لە ناوچەیەکی پڕ لە داروپەردوو ژیان بەسەربەرن، ئێمە پشتیووانی لە دیدگای دۆناڵد ترەمپ دەکەین بۆ ئاوەدانکردنەوەی غەززە. 

 

زانیاریی زیاتر: لووتکەی عەرەبی ئەوەی دووپاتکردەوە، نابێت فەلەستینییەکان ئاوارە و نیشتەجێی شوێنیکی دیکە بکرێن، بەڵکو دەبێت لە خاکی خۆیان بمێننەوە. هاوکات پلانی میسر بۆ ئاوەدانکردنەوەی کەرتی غەززە پەسەندکرا.

 

ئەوەی پێویستە بیزانیت: پلانی میسر بۆ ئاوەدانکردنەوەی غەززە لە ماوەی پێنج ساڵدا بە بڕی 53 ملیار دۆلار دەخەملێنرێت. بەشێکی پلانەکە نەمانی حەماس لە کەرتی غەززە لەخۆدەگرێت.