سووریا بەشداری کۆبوونەوەی ڕێکخراوی قەدەغەکردنی چەکی کیمیایی دەکات

ئاڤا نیوز

سووریا بۆ یەکەمجار بەشداری لە کۆبوونەوەی ڕێکخراوی قەدەغەکردنی چەکی کیمیایی دەکات کە چاوەڕوان دەکرێت ئەمڕۆ لە هۆڵەندا بەڕێوەبچێت.

وێنەگەورەکە: ڕۆژی چوارشەممە 2025-03-05، لە شاری لاھای ڕۆژئاوای ھۆڵەندا، بە بەشداری ئەسعەد شەیبانی، وەزیری دەرەوەی سووریا بۆ یەکەمجار وڵاتەکەی بەشداری لە کۆبوونەوەی ڕێکخراوی قەدەغەکردنی چەکی کیمیایی (OPCW) دەکات.

ڕاگەیێنراوی فەرمی: ئەسعەد شەیبانی لە تۆڕی کۆمەڵایەتی ئێکس ڕایگەیاند: "بۆ یەکەمجار لە مێژوویی سووریا، لە لاھای بەشداری لە کۆبوونەوەی ئەنجوومەنی جێبەجێکاری ڕێکخراوی قەدەغەکردنی چەکی کیمیایی دەکەم".

گوتیشی، بەشدارییکردن لەم کۆبوونەوەیە، پابەندبوونی سووریایە بە ئاسایشی نێودەوڵەتی و دڵسۆزی بۆ ئەوانەی کە لەسەر دەستی ڕژێمی ئەسەد گیانیان لەدەستداوە.

باکگراوند: لە ساڵی 2013ـدا، ڕژێمی ڕووخاوی بەشار ئەسەد، بە چەکی کیمیایی ناوچەی غوتەی ڕۆژھەڵاتی بۆردوومان کرد بەو ھۆیەوە ھەزار و 400 کەسی سڤیل گیانیان لەدەستدا.

بۆچی گرنگە: ڕژێمی پێشووی سووریا پێشتر چەندین جار بەوە تۆمەتبار کراوە کە چەکی کیمیایی دژی هاووڵاتییانی بەکارهێناوە، ئێستا بەشداری کردنی سووریا لەم کۆبوونەوەدا پەرە بە پەیوەندییە نێودەوڵەتییەکانی و گرنگی پێگەی سووریا بۆ وڵاتانی ڕۆژئاوا دیاری دەکات.