کریملن: نامەکەی زێلێنسکی ئەرێنیە

ئاڤا نیوز

کۆشکی کریملن پێشوازی لە نامەکەی ڤۆلۆدیمێر زێلێنسکی، سەرۆکی ئۆکراینا دەکات و بە هەنگاوێکی ئەرێنی بۆ ڕێککەوتنامەی ئاشتی دادەنێت.

وێنە گەورەکە: دوای گفتووگۆی تووندی نێوان دۆناڵد ترەمپ، سەرۆکی ئەمریکا و ڤۆلۆدیمێر زێلێنسکی، سەرۆکی ئۆکراینا لە کۆشکی سپی و ناڕازیبوونی زێلێنسکی بە ڕاگرتنی جەنگ، دۆناڵد ترەمپ پەیامێکی ئاراستەی سەرۆکی ئۆکراینا کرد و وتی "هەرکات ئامادەی دانوستان بوویت دەتوانی بگەڕێیتەوە کۆشکی سپی"، لە ئێستادا زێلێنسکی ئامادەیی بۆ ئاشتی دەربڕیووە و کریملن پێشوازی لە پەیامەکە دەکات.

لێدوانی فەرمی: دیمیتری پیسکۆڤ، گوتەبێژی کریملن ڕایگەیاند: "پێشوازیی لە نامەکەی ڤۆلۆدیمێر زێلێنسکی دەکەین، چونکە کاریگەریی ئەرێنیی هەیە".

گوتیشی،"پرسیارەکە ئەوەیە، کێ لەگەڵ سەرۆکێکی نایاسایی و قەدەغەکراو دادەنیشێت؟ڕاستە نامەکەی باش بووە، بەڵام تاوەکوو ئێستاش هیچ گۆڕانکارییەک ڕووینەداوە".

ئەوەی پێویستە بیزانیت: قسەکانی پیسکۆڤ دوای ئەوە هات، کە دۆناڵد تڕەمپ، سەرۆکی ئەمریکا لە گوتارەکەیدا لەبەردەم کۆنگرێسی وڵاتەکەی ڕایگەیاند: "نامەیەکی لە لایەن ڤۆلێدیمێر زێلێنسکی، سەرۆکی ئۆکرانیا پێ گەشتووە، کە ئامادەی خۆی بۆ دانووستان لەگەڵ ڕووسیا نیشان داوە".