فوئاد حوسێن: ئەگەر پارتی سەرۆککۆمار بباتەوە پۆستەکانی دیکە بە یەکێتی دەدرێت

ئاڤا نیوز

کاندیدی پارتی دیموکراتی کوردستان بۆ پۆستی سەرۆککۆماری عێراق دەڵێت، ئەگەر پارتی لە کۆبوونەوەی ڕۆژی سێشەممەدا پۆستی سەرۆککۆمار بە دەنگدانی پەرلەمانتاران بباتەوە، یەکێتی پۆستەکانی جێگری سەرۆکی پەرلەمانی عێراق و وەزارەتی دەرەوەی عێراق وەردەگرێت.

چیرۆکی سەرەکی: ڕۆژی سێشەممە 27ـی ئەم مانگە، پەرلەمانی عێراق بۆ هەڵبژاردنی سەرۆککۆمار کۆدەبێتەوە و 19 کەسیش لەسەر پۆستەکە کێبڕکێ دەکەن، کە دیارترینیان بریتین لە فوئاد حوسێن، کاندیدی پارتی و نزار ئامێدی، کاندیدی یەکێتی نیشتیمانی کوردستان.

لێدوانی فەرمی: فوئاد حوسێن، کاندیدی پارتی دیموکراتی کوردستان بۆ پۆستی سەرۆککۆماری عێراق شەوی ڕابردوو میوانی کەناڵی UTVـی بوو و ئاماژەی بەوەکرد، پۆستی سەرۆککۆمار بۆ یەکێتی نیشتیمانی کوردستان تاپۆ نەکراوە، بەڵکو بەگوێرەی عورفی سیاسی عێراق ئەم پۆستە بەرکەوتەی کوردە و لە کۆبوونەوەی ڕۆژی سێشەممەدا بە بڕیاری پەرلەمانتاران یەکلایی دەبێتەوە.

ئاماژەی بەوەشکرد، ئەگەر پارتی پۆستی سەرۆککۆمار بباتەوە، جێگری دووەمی سەرۆکی پەرلەمانی عێراق و وەزارەتە سیادییەکەی پشکی کورد لە حکومەتی عێراق وەک (وەزارەتی دەرەوە) بە یەکێتی دەدرێت، پارتیش دوو وەزارەتی دیکەی وەردەگرێت.

ئەوەی پێشبینی دەکرێت: فوئاد حوسێن پێشبینی دەکات سەرۆککۆمار لە خولی دووەمی دەنگدان یەکلایی ببێتەوە، دواتریش پێویست دەکات سەرۆککۆمار بەپەلە نووری مالیکی، کاندیدی چوارچێوەی هەماهەنگی بۆ پۆستی سەرۆکوەزیران بۆ پێکهێنانی حکومەت ڕابسپێرێت.

لەلایەکی دیکەوە: لەبارەی ناڕەزاییەکان لەسەر کاندیدکردنەوەی مالیکی،  فوئاد حوسێن باسی لەوەکرد، لەکۆی 12 سەرکردەی چوارچێوەی هەماهەنگی، 10 سەرکردەیان دەنگیان بە کاندیدکردنی مالیکی داوە و ئەوەش مانای وایە ناوبراو زۆرینەی ڕەهای ئەم هاوپەیمانێتییەی لەگەڵدا دایە و ئەوانیش پێشوازیی لێدەکەن.