پرۆژەی ڕووناکی بۆ کارەبای 24 کاتژمێری دەگاتە شاری سلێمانی

ئاڤا نیوز

پرۆژەی ڕووناکی حکومەتی کوردستان، دوای سەرکەوتنی لە ژمارەیەک گەڕەکی هەولێر دەگاتە شاری سلێمانی و ئەمشەو لە یەکەم گەڕەک دەستپێدەکات، تاوەکو ساڵی 2026 پڕۆژەكە تەواوی هەرێمی كوردستان دەگرێتەوە.

وێنە گەورەکە: پڕۆژەی ڕووناكی، لەناو جەرگەی شاری سلێمانییەوە دەستیپێکردووە. وەک سەرەتاش بازاڕی سلێمانی و بەشێک لە گەڕەکەکانی سلێمانی وەک (ئیبراهیم پاشا، سابوونکەران، دارۆغا، حاجی حان، مەولەوی، جادەی ئۆرزدی، سەلیم بەگ و خانەقا) دەگرێتەوە.

لێدوانی فەرمی: سیروان محەممەد، وتەبێژی كارەبای سلێمانی تایبەت بە ئاڤا ڕایگەیاند،

- کارکردن بۆ کارەبای 24 کاتژمێری لە گەڕەکەکاندا تەواوبووە وەک قۆناغی ئەزموونی و دەستپێک، 11 فیدەری كارەبا دیاریکراون کە کارەباکەیان دەبێتە 24 کاتژمێری.

- ئەمەش بەردەوام دەبێت و بڕیارە تاوەکو کۆتایی ساڵی 2025، هاوشانی شار و شارۆچکەکانی دیکەی هەرێمی کوردستان، ئەم خزمەتگوزارییە تەواوی سلێمانی بگرێتەوە.

پێدراوە ڕاستەکان: لە چوارچێوەی ڕووناکی، هاوبەشان بەپێی بڕی بەکارهێنانی کارەبا پارە دەدەن، ئامانج لە پڕۆژەکە ئەوەیە چینی کەمدەرامەت و مامناوەند لە گرانی نرخی کارەبا بپارێزێ، بەشێوەیەک کە هەمان پارەی پێشووتر یان کەمتر بدەن بە کارەبا کە پێشتر داویانە بە مۆلیدە و گشتی. 

لەلایەکی دیکەوە: تیمی پڕۆژەی ڕووناکی دەڵێن، بەمزووانە کەمپەینێک بۆ بەرزکردنەوەی ئاستی هۆشیاری هاووڵاتی لەسەر بەکارهێنانی کارەبا ڕادەگەینێت کەوا یارمەتیدەری هاوڵاتی بێت لە بەکارهێنانی بەرپرسیارانە.

باکگراوند: سەرۆكوەزیران مەسرور بارزانی، ڕۆژی 17-10-2024 پڕۆژەی ڕووناكی ڕاگەیاند، كە بەهۆیەوە كارەبای 24 کاتژمێری بۆ هاوبەشان دەستەبەر دەكات، بەگوێرەی پلانەكەش تا ساڵی 2026 پڕۆژەكە تەواوی هەرێمی كوردستان دەگرێتەوە.