ئاژانسی وزە: ئێران بۆ درووستکردنی بۆمبی ئەتۆمی بە سیاسەتەکانیدا دەچێتەوە

 

ئاڤا نیوز

بەڕێوەبەری ئاژانسی نێودەوڵەتیی وزەی ئەتۆمی، هۆشداری لە پێشبڕکێی خۆپڕچەککردن دا و گوتیشی هەندێک وڵات لەم چوارچێوەیەدا پلانی بەئەتۆمیبوونیان هەیە.

وێنە گەورەکە: لەکاتێکدا ئێران ئامادەیی خۆی بۆ دەستپێکردنەوەی دانوستانەکان لەسەر بەرنامە ئەتۆمییەکەی لەگەڵ وڵاتانی ڕۆژئاوا نیشانداوە، بەڵام ئەو وڵاتە بەردەوامە لە پەرەپێدانی بەرنامە ئەتۆمییەکەی.

لێدوانی فەرمی: ڕافائێل گرووسی، بەڕێوەبەری ئاژانسی نێودەوڵەتیی وزەی ئەتۆمی ڕایگەیاند: ئێران سەرقاڵی پێداچوونەوەیە بە سیاسەتە ئەتۆمییەکانی بە جۆرێک کە بتوانێت بۆمبی ئەتۆمی درووست بکات.

زانیاریی زیاتر: بە گوتەی بەڕێوەبەری ئاژانسی نێودەوڵەتیی وزەی ئەتۆمی، سزا نێودەوڵەتییەکان کاریگەرییان لە سەر بەرنامە ئەتۆمییەکەی ئێران نییە و ئەو وڵاتە لە ساڵی 2018ـەوە بە خێرایی پەرەی بە بەرنامە ئەتۆمییەکەی داوە. ئەو هۆشداریشی داوە لەوەی سیستەمی جیهانی و یاسا نێودەوڵەتییەکان لاواز دەبن و هەندێک لە وڵاتان، لە ناویشیاندا ئێران، لەو باوەڕەدان کە لە ڕێگەی بەدەستهێنانی بۆمبی ئەتۆمییەوە دەتوانن ئاسایشی خۆیان دەستەبەر دەکەن.