زیاتر لە 100 هەزار فەرمانبەر ماون لە وەرگرتنی زەوی سوودمەند بن

 

ئاڤا نیوز

هەزاران فەرمانبەر ماون لە وەرگرتنی زەوی سوودمەند بن، بەم زووانەش 20 ھەزار پارچە زەوی بەسەر فەرمانبەراندا دابەش دەکرێت.

وێنە گەورەکە: فۆرمی وەرگرتنی زەوی بۆ نزیکەی 55 هەزار فەرمانبەر و خانەنشین ڕەوانەی ئەنجوومەنی وەزیران کراوە و وەزارەتی شارەوانی چاوەڕێی پەسەندکردنیانە، هاوکات پرۆسەی دابەشکردنی زەوی لە سنووری شارەوانییەکان بەردەوامە.

لێدوانی فەرمی: سەربەست مەولوود، سەرپەرشتیاری تیمی وردبینیکردن لە فۆرمی دابەشکردنی زەوی لە وەزارەتی شارەوانی بە ئاڤا میدیای ڕاگەیاند: لیست و ناوی تەواوی وەزارەتەکان نەگەیشتووەتە وەزارەتی شارەوانی و وردبینیان بۆ نەکراوە، بەگوێرەی داتاکانیش زیاتر لە 100 هەزار فەرمانبەر ماون تاوەکو لە وەرگرتنی زەوی سوودمەند بن.

زانیاریی زیاتر: لە سنووری هەر شارەوانییەک ئەگەر زەوی ئامادەبێت، دەست بە دابەشکردنی دەکرێت، بەم زووانەش 20 ھەزار فەرمانبەر لە ھەولێر زەوییان پێ دەدرێت.