تەرزە لە بیابانەکانی باشووری عێراق دەبارێت و سپیپۆش دەبێت

ئاڤا نیوز

لە دیمەنێکی ناوازەدا، بۆ یەکەمجار بیابانەکانی نێوان شاری ناسڕیە و سەماوە گۆڕاون بۆ گۆڕەپانی تەرزە و سپی پۆش بووە، شارەزایەکی ژینگەش دەڵێت، کاریگەریی ئەرێنی لەسەر ژینگەی ناوچەکە هەیە.

چیرۆکی سەرەکی:  لە ڕۆژی پێنجشەممەوە، بارانبارینی بەخوڕ لە پارێزگاکانی بەغدا، دیالە، بابل، ئەنبار، دیوانیە، زیقار، سەماوە و بەسرە بەردەوامە، کە زۆربەیان بەهۆی خراپی کەشوهەواوە پشووی فەرمییان لە دامودەزگا و ناوەندەکانی خوێندن ڕاگەیاندووە.

زانیاریی بەدەستهاتوو: بەهۆی زۆربارینی تەرزەوە، ناوچە بیابانییەکەی نێوان هەردوو شاری ناسڕیە و سەماوە سپی پۆش بووە و  گردەکانی بیابانەکە بوونەتە "تۆپەڵەی سپی".

لێدوانی فەرمی: ڕەعد ئەسەدی، چالاکوانی بواری ژینگە بە ئاڤا میدیای ڕاگەیاند: ئەم بارانە بەستەڵەکە کاریگەریی ئەرێنی لەسەر ژینگەی ناوچەکە هەیە، بارینی تەرزە یارمەتیدەرە بۆ تووندکردنی خاک، ئەمەش ئەگەری گەشەکردنی ڕووەکی سروشتی بەرز دەکاتەوە.

وتیشی، ئەم دیاردەیە یارمەتیدەرە بۆ زیادکردنی ئاوی ژێر زەوی، کە توانای ناوچەکە بۆ ڕووبەڕووبوونەوەی بیابانبوون زیاد دەکات و ژینگەکە باشتر دەکات.