سەرۆکی پارتێکی سووریا بۆ ئاڤا: دەرفەت هەیە مافی پێکهاتەکان گەرەنتی بکرێت

ئاڤا نیوز

سەرۆکی جووڵانەوەی کاری نیشتیمانی لەپێناو سووریا دەڵێت، گرنگە لە قۆناغی نوێی وڵاتدا کورد و هەموو پێکهاتەکانی دیکە بەشێوەیەکی ئازادانە پیادەی مافەکانیان بکەن، بۆ ئەو مەبەستەش ئێستا لە هەموو کاتێک زیاتر دەرفەت هەیە بۆ ئەوەی لە دەستووری نوێدا مافی پێکهاتەکان گەرەنتی بکرێت.

چیرۆکی سەرەکی: دوای ڕووخانی دەسەڵاتی ئەسەد لە سووریا، دەستوورێکی کاتی بۆ قۆناغی ڕاگوزەر دەنووسرێتەوە کە چاوەڕێ دەکرێت ماوەکەی بۆ چوار ساڵ بێت، لەو ماوەیەدا کارەکانی نووسینەوەی دەستوور و داواکاریی پێکهاتەکان لە داهاتووی وڵاتەکەدا گفتوگۆی لەسەر دەکرێت.

لێدوانی فەرمی: ئەحمەد ڕەمەزان، سەرۆکی جووڵانەوەی کاری نیشتمانی لەپێناو سووریا لە میانەی بەشداریکردنی لە گەشتی هەواڵەکانی کاتژمێر 01:00ی ئاڤا میدیا ڕایگەیاند:

- لە گرژییەکانی چەند ڕۆژی ڕابردووی پارێزگا کەناراوەکانی سووریا دەستی ئێران و حیزبوڵڵا دیاربوو و شکستیان هێنا، چونکە خەڵک پشتیوانی نەکردن.

- هێزە ئەمنییەکان بەشێوەیەکی گشتی پابەندی بنەمای پاراستنی هاووڵاتیانی مەدەنی بوون، پێم وایە دەبێت هەموو لایەنەکان دان بە خۆیاندا بگرن و ئەندامانی ڕژێمی پێشوو کە بەشداربوون لەم هێرشەدا لێپرسینەوەیان لەگەڵ بکرێت.

- گفتوگۆی نێوان ئیدارەی ڕۆژهەڵاتی سووریا (ڕۆژئاوای کوردستان) و دیمەشق بەردەوامە و ئومێد بۆ چارەسەری کێشەکان هەیە، بەجۆرێک دەوڵەتی سووریا بتوانێت کۆنترۆڵی بەسەر هەموو خاکی وڵاتەکەدا هەبێت.

- سوورییەکان مافی ئەوەیان هەیە گوزارشت لە کەلتوور، زمان و هەموو مافەکانی خۆیان بکەن و دەستوور ئەو بابەتانە گەرەنتی دەکات، گرنگیشە حکومەتی سووریا گفتوگۆ لەگەڵ کورد بکات، بەڵام پێویستە گفتوگۆکە گشتگیر بێت نەک تەنیا لەگەڵ یەک لایەن بێت.