ئاڤا کارێکی نایاسایی لە بەنداوەکانی دووکان و دەربەندیخان ئاشکرا دەکات

ئاڤا نیوز

بەشێك لەو خانوو و کەرەڤانانەی کە لە دەوروبەری بەنداوی دەربەندیخان کە موڵکی گشتین و بۆ فەرمانبەران و کارمەندانی بەنداوەکە دروست کراون، كڕین و فرۆشتنیان پێكراوە. بەڕێوەبەرایەتیی گشتیی كارەبای سلێمانیش داوای ڕوونکردنەوە دەکات.

وێنە گەورەکە: لە دەوروبەری بەنداوەكانی كوردستان کەمپ دروست کراوە تا ئەو فەرمانبەرانەی کار لەسەر بەكارخستن و کارەبا و چاودێریی بەنداوەکە دەکەن، تێیاندا بمێننەوە.

زانیاریی تایبەت: ئاڤا زانیویەتی بە نایاسایی بەشێك لە خانووەکانی کەمپی بەنداوی دەربەندیخان کە شوێنەکەیان گەشتیارین و بەسەر بەنداوەکە دەڕوانن، كڕین و فرۆشتنیان پێ كراوە و خەڵكانێكی تێدایە کە كارمەندی بەنداوەکە نین، بەڵام دەوترێت كەسانی دەستڕۆیشتوو و بەرپرسن.

زانیاریی زیاتر: بەڕێوەبەرایەتیی گشتیی كارەبای سلێمانی لەسەر داوای داواكاری گشتیی داوای ڕوونكردنەوەی لە هەردوو بەڕێوەبەرایەتیی بەرهەمهێنانی وزەی كارەبای (دەربەندیخان و دووكان) كردووە كە زانیاریی پێویستیان لەسەر ئەم کێشەیە بۆ بنێرن، بەڵام تا ئێستا وەڵامیان نەداوەتەوە.

لێدوانی فەرمی: بەرپرسێكی ئیداریی دەربەندیخان بە ئاڤای گوت: ئەم کڕین و فرۆشتنە ڕاستە، ئەویش خانووی ئەو فەرمانبەرانەی بەنداوەکەیە کە كاتی خۆی لە نەوەدەكان ئەو خانووانەیان بە ناوەوە تەملیك كرابوو و ئێستا خانەنشین بوونە و  فرۆشتوویانن بە هەندێک بەرپرس كە فڕیان بە فەرمانبەری تەشغیلی كارەبا و پاراستنی بەنداوەکەوە نییە.

ئەوەی پێویستە بیزانیت: 400 فەرمانبەری هەرێمی كوردستان لە هەردوو بەنداوی دووكان و دەربەندیخان كار دەكەن و مووچەیان لەسەر بەغدایە.