گەورەترین سابوونی حەلەبی لە جیهاندا دروست دەکرێت

ئاڤا نیوز

لە شاری حەلەبی پایتەختی ئابووری سووریا، گەورەترین سابوون لە ئاستی جیهان دروستکراوە و کێشەکەی 1520 کیلۆگرامە، دروستکردنەکەی دوو ساڵی خایاندووە.

چیرۆکی سەرەکی:  سابوونێک لە ناوچەی شوێنەواری خان سابوونی ناوەندی حەلەب بۆ نمایشی گەشتیار و سەردانیکاران دانراوە، دروستکردنەکەی دوو ساڵی خایاندووە، بەس وشککردنەوەکەی ساڵێکی خایاندووە، بەوهۆیەش ناوی چووەتە کتێبینی گینس بۆ ژمارە پێوانەییەکان وەک گەورەترین سابوون لە جیهان.

لێدوانی فەرمی: شەهم دحان، بەڕێوەبەری کارگەی دقە قەدیمە کە سابوونەکەی دروستکردووە، دەڵێت، سابوونەکە تەواو سروشتییە و لە زەیتی زەیتوون و زەیتی گەڵای غار دروستکراوە، ئێستاش لە ناوچەی خان سابوون کە شوێنێکی تایبەتە بە نیشاندانی جۆرەکانی سابوون، نماییشکراوە.

باکگراوند: مێژووی سابوونی حەلەبی بۆ سێ هەزار ساڵ لەمەوبەر دەگەڕێتەوە و بە یەکێک لە کۆنترین جۆرەکانی سابوون لە جیهان هەژمار دەکرێت، سەرەڕای شەڕی ناوخۆیی سووریا و خاپووربوونی حەلەب، بەڵام پیشەسازیی دروستکردنی سابوونی حەلەبی نەوەستاوە و ئێستا دوای ڕووخانی دەسەڵاتەکەی ئەسەد ئومێدی گەشانەوەی زۆری ئەو پیشەسازییە دەکرێت، لە ماوەی ڕابردوودا یۆنسکۆش سابوونی حەلەبی خستە ناو لیستی میراتی ڕۆشنبیری جیهانییەوە.