یەکێتی لە کۆمیتەکانەوە تا ئەنجوومەنی باڵا گۆڕانکاری دەکات

ئاڤا نیوز

یەکێتیی نیشتمانی دیداری گشتیی ئەنجامدەدات و بڕیار لەسەر چەند گۆڕانکارییەکی ناوخۆیی دەدات، ئەندامێکی ئەنجوومەنی سەرکردایەتی ئەو حیزبەش دەڵێت، "زۆر گۆڕانکاری لەناوخۆدا دەکرێت".

وێنە گەورەکە: ئەم هەفتەیە مەکتەبی سیاسیی و ئەنجوومەنی سەرکردایەتیی یەکێتیی کۆبوونەوە، ئەمەش قسە و باسی زۆری لەبارەی گۆڕانکارییە ناوخۆییەکانی حزبەکە بەدوای خۆیدا هێنا، ئاڤا بەدواداچوونی کرد و وردەکاری گۆڕانکارییەکان لێرەوە دەخاتەڕوو.

زانیاری تایبەت: ئەندامێکی ئەنجوومەنی سەرکردایەتیی یەکێتی بە ئاڤا میدیای ڕاگەیاند:

- یەکێتی لە موسڵ، دهۆک، هەولێر، سۆران دیداری کردووە، تەنیا کەرکووک و سلێمانی ماون، ئەوانیش لەمانگی ڕەمەزاندا لەگەڵ دیداری گشتیی ئەنجامدەدرێن.

- گۆڕانکاری لەبەرپرسی مەڵبەندەکان دەکرێت، دوو بۆچوون هەیە، یەکەمیان بەشێک لە بەرپرسەکان بگۆڕدرین، دووەم سەرجەم بەرپرسی مەڵبەندەکان بگۆڕدرێن، چونکە بەشێکیان توانای ئەو بەرپرسیارێتیەیان نییە، بەشەکەی دیکەیان دەخرێنە بەرپرسیارێتی دیکە.

- قسە لەسەر گۆڕینی سەرکەوت زەکی، لێپرسراوی مەکتەبی ڕێکخستن و بڵێسە جەبار فەرمان، لێپرسراوی مەکتەبی شەهیدان و تێکۆشەران هەیە.

- گۆڕانکاری لە مەکتەبەکان دەکرێت، پێشنیاز بۆ دروستکردنی دوو مەکتەبی دیکە دەکرێت بەناوی، مەکتەبی چاودێری و مەکتەبی داتا و ئامار، هەروەها پێشنیاز بۆ لابردنی هەردوو مەکتەبی ڕێکخراوەکان و مەکتەبی شەهیدان و تێکۆشەرانیش کراوە.

- دوو پڕۆژە بۆ گۆڕینی پەیکەری یەکێتی پێشنیاز کراوە، ڕەنگە دواتر هەردوو پڕۆژەکەش تێکهەڵکێش بکرێن.

پڕۆژەی یەکەم؛ مەڵبەند و کۆمیتەکان تەجمید بکرێن و بەشێوەی بازنە کار بکرێت، هاوشێوەی بازنەکانی هەڵبژاردنی پەرلەمانی کوردستان.

پڕۆژەی دووەم؛ کۆمیتەکان بهێڵرێنەوە، کار لەسەر بنەمای بنکە و وێستگەکانی ڕێکخستن بکرێت، ئەگەر کۆمیتەکانیش بمێننەوە و بکرێن بە بازنەی کۆمیتە، بۆ نموونە سلێمانی 20 کۆمیتەی نابێت و دەکرێت بە چوار زۆن و بازنە.

- یەکێتی بڕیاریداوە جێگر بۆ سەرۆک دابنێت، بۆ ئەم پۆستەش ڕەفعەت عەبدوڵڵا پێشنیازکراوە و وەک باس دەکرێت یەکلاییش کراوەتەوە.

- هەر شتێک بەریەکەوتن یان دژی پەیڕەوی ناوخۆ بێت، ئەوا لە دیداری یەکێتی بڕیاری لەسەر دەدرێت، چونکە دیدار دەسەڵاتی هەیە.

- پێشنیاز بۆ چەند گۆڕانکارییەک لە پەیڕەوی ناوخۆی یەکێتی کراوە، لەوانە زیادکردنی سێ تاوەکو پێنج ئەندامی ئەنجوومەنی سەرکردایەتی، هەروەها بڕیاردان لەسەر کاراکردن یاخوود لابردنی ئەنجوومەنی باڵای بەرژەوەندییەکان و ئەنجوومەنی پشتیوانی یەکێتی.

ئەوەی پێویستە بیزانیت: یەکێتی تاوەکو ئێستا پێنج کۆنگرە و پێنج پلینیۆم و یەک دیداری ئەنجامداوە، هەروەها ئێستا 60 ئەندامی ئەنجوومەنی سەرکردایەتی هەیە.