ئەوروپا ڕێگای نوێ بۆ ڕێگریکردن لە کۆچبەران پەیڕەو دەکات

 

ئاڤا نیوز

دوای چەند مانگێک لە دانوستانەکان، یەکێتیی ئەوروپا پێشنیازەکانی خۆی بۆ خێراکردنی دیپۆرتکردنەوەی کۆچبەرانی نائاسایی ئاشکرا کرد، بەتایبەتی بە دابینکردنی چوارچێوەیەکی یاسایی بۆ دامەزراندنی ناوەندەکانی کۆچبەران لە دەرەوەی سنوورەکانی.

چیرۆکی سەرەکی: بەهۆی پێداگری هەندێک لە وڵاتانی ئەندام، کۆمیسیۆنی ئەوروپا کەوتە ژێر فشارەوە بۆ توندکردنەوەی سیاسەتی کۆچبەری، و پێشنیازێکی بۆ دامەزراندنی "ناوەندی گەڕانەوە" پێشکەش کرد، لەبەرامبەریشدا ڕێکخراوە ناحکومییەکان ڕەخنەیان لەم هەنگاوە گرت.

پێشنیازی کۆمیسیۆنی ئەوروپا ئەم خاڵانە لەخۆدەگرێت:

٠ میکانیزمێک کە ڕێگە بە وڵاتانی ئەندام دەدات لە وڵاتانی دەرەوەی یەکێتییەکە، ناوەند بۆ کۆچبەران بکەنەوە، بە بیرۆکەی دیپۆرتکردنەوەی ئەو کەسانەی کە داواکاری پەنابەرییان ڕەتکراوەتەوە و ڕووبەڕووی پابەندبوون دەبنەوە بۆ جێهێشتنی خاکی ئەوروپا بۆ ناوەندەکانی گەڕانەوە. کۆمیسیۆن پلانی نییە ناوەندەکان بکاتەوە، بەڵکو ئەم بژاردەیە بۆ وڵاتانی ئەندام جێدەهێڵێت. کارەکانی کۆمسیۆن سنووردارە بە "دامەزراندنی چوارچێوەیەکی یاسایی" نەک ناوەندەکان، داوا دەکات ناوەندەکان ڕێز لە یاسا نێودەوڵەتییەکان بگرن.

٠ سەپاندنی ڕێسا و سزای توندتر بەسەر ئەو پەنابەرانەی ڕەتیدەکەنەوە خاکی ئەوروپا بەجێبهێڵن، وەک دەستبەسەرداگرتنی ناسنامە و دەستبەسەرکردن و ڕێگریکردنیان لە چوونە ناو وڵاتانی ئەوروپا بۆ ماوەیەکی درێژ.

٠ دانپێدانان بەو بڕیارانەی کە لەلایەن وڵاتێکی ئەندامی ئەوروپاوە دەدرێن، واتە بۆ نموونە بڕیارێک لە نەمسا دراوە، دەتوانرێت لە ئیسپانیا جێبەجێ بکرێت.

لێدوانی فەرمی: ماگنوس برونەر، کۆمیسیاری کۆچبەری یەکێتی ئەوروپا کە دەقی پێشنیازەکەی داڕشتووە، جەختی لەوە کردووەتەوە کە ئەم ڕێوشوێنانە ئەو هەستە بۆ هاوڵاتیان دەگەڕێنێتەوە ئەوان کۆنتڕۆڵی ئەو شتانە دەکەن کە لە ئەوروپا ڕوودەدەن.

زانیاری زیاتر: ئیسپانیا هەر لەسەرەتاوە ئەو پڕۆژەیەی ڕەتکردەوە و نیگەرانی خۆی دەربڕی کە ڕێز لە مافەکانی مرۆڤ ناگرێت، لەلایەکی دیکەوە وڵاتانی ئەسکەندەنافیا و و هۆڵەندا پاڵپشتی لە پێشنیازەکە دەکەن و دەیانەوێت بە زووترین کات ناوەندەکان بکەنەوە، هاوکات، یۆهان فۆرسێل، وەزیری کۆچبەرانی سوید ڕاگەیاند، ساڵانێکە بۆ ڕێگریکردن لە کۆچی نایاسایی ڕێگای دیکەیان تاقیکردووەتەوە، بەڵام سەرکەوتوو نەبوون.

ئەوەی پێویستە بیزانیت: لە ئێستادا بە ڕێژەی کەمتر لە 20%ـی بڕیارەکانی دەرکردنی کۆچبەران لەناو یەکێتی ئەوروپادا جێبەجێ دەکرێت و کۆمیسیۆنی ئەوروپا دەیەوێت ڕێگە بە وڵاتانی ئەندام بدات "چارەسەری نوێ" تاقیبکەنەوە بۆ خێراکردنی ئەم بڕیارانە.

باکگراوند: هەوڵەکان بۆ توندکردنەوەی یاساکانی کۆچبەری ئەوروپا لە کاتێکدایە کە ژمارەی کۆچی نایاسایی لە سنوورەکانی یەکێتی ئەوروپا بە شێوەیەکی بەرچاو کەمیکردووە، بەپێی داتاکانی دەزگای پاسەوانی سنوور و کەناراوەکانی ئەوروپا لە ساڵی 2024 کۆچی نایاسایی نزمترین ئاستی خۆی تۆمارکردووە، ئەمەش لەدوای ساڵی 2021ـەوە کە بەهۆی بڵاوبوونەوەی کۆرۆنا حاڵەتەکانی کۆچی نایاسایی کەمیکردبوو.