ئەردۆغان: ئامادەین میوانداری دانووستانی ئاگربەستی ڕووسیا و ئۆکراینا بکەین

 

ئاڤا نیوز

ڕەجەب تەیب ئەردۆغان، سەرۆککۆماری تورکیا، ئامادەیی وڵاتەکەی بۆ میوانداریکردنی دانووستانی ئاشتی نێوان ئۆکراینا و ڕووسیا نیشاندا، جارێکی دیکەش گرنگی ئەندامبوونی تورکیای لە یەکێتی ئەوروپا دووپات کردەوە.

چیرۆکی سەرەکی: ئەردۆغان لە کۆشکی کۆماری پێشوازی لە دۆناڵد توسک، سەرۆکوەزیرانی پۆلۆنیا کرد، پرسی ئاگربەستی ئۆکراینا و ئەندامبوونی تورکیا لە یەکێتی ئەوروپا لە گفتووگۆکان باس کران.

زانیاریی زیاتر: لە چوارچێوەی هەوڵەکان بۆ ڕاگرتنی شەڕی ئۆکراینا و ڕووسیا، ئەردۆغان پێشوازی لە ئاگربەستە 30 ڕۆژیەکە کرد کە بە نێوەندگیری ئەمریکا لەلایەن ئۆکرایناوە پەسەند کرا، ئامادەی وڵاتەکەی بۆ هەموو جۆرە پشتیوانییەک لە نێویاندا "تورکیا خاوەن ماڵ بێت لە دانووستانەکان" نیشاندا، هیواشی خواست ڕووسیا بەشێوەیەکی بەرهەمدار بەشداری لەو ئاگربەستە بکات.

لە لایەکی دیکەوە: سەرۆککۆماری تورکیا، جارێکی دیکە خواستی خۆی بۆ ئەندامبوونی تورکیا لە یەکێتی ئەوروپا نیشاندا و گوتی: دەمەوێت جارێکی دیکە ئەمە بڵێم، یەکێتیی ئەوروپا ئەگەر دەیەوێت ڕێگری لە لەدەستدانی هێز و کاریگەرییەکەی بکات، یاخود پێچەوانەی بکاتەوە. ئەمە تەنیا بە ئەندام بوونی تورکیا بەدەست دەهێنێت.