حکومەتی سووریا: نەوت لە عێراقەوە هاوردە ناکەین

ئاڤا نیوز

 

حکومەتی سووریا ڕەتیکردەوە هیچ دانووستانێکی لەگەڵ عێراق سەبارەت بە هاوردەکردنی نەوت یاخود دووبارە بەکارهێنانی هێڵی بۆری نەوتی کەرکووک - بانیاس کردبێت.

زانیاریی بەدەستهاتوو: سەکۆی وزەی نێودەوڵەتیی کە بنکەکەی لە واشنتنە، بەپشت بەستن بە زانیارییەکانی وەزارەتی نەوت و سامانە سروشتییەکانی سووریا ئاشکرایکرد، تاوەکو ئێستا هیچ دانووستانێک لەگەڵ عێراق و سعودییە بۆ هاوردەکردنی نەوت نەکراوە.

لێدوانی فەرمی: ئەحمەد سلێمان، بەڕێوەبەریی پەیوەندییە گشتییەکانی وەزارەتی نەوت و سامانە سروشتییەکانی سووریا ڕایگەیاند: بۆڕیی گواستنەوەی نەوتی عێراق –  سووریا پێویستی بە نۆژەنکردنەوە هەیە، تا ئەمڕۆش چارەسەر نەکراوە.

زانیاریی زياتر: پێش ڕووخانی ڕژێمی ئەسەد، سووریا بۆ دابینکردنی پێداویستییە ناوخۆییەکانی ڕۆژانە نزیکەی 120 هەزار بەرمیل نەوتي خاوي لە عێراقەوە هاوردە دەکرد.

ئەمەش بزانە: بۆريی کەرکووک - بانیاس بە درێژایی 800 کیلۆمەتر ساڵی 1952 دروستکراوە، توانای گواستنەوەی 300 هەزار بەرمیل نەوتی هەیە لە ڕۆژێکدا، ئەم بۆرییە ڕۆڵی گرنگی هەبووە لە هەناردەکردنی نەوتی عێراق لە کەرکووکەوە بۆ بەندەری بانیاس لەسەر دەریای ناوەڕاست.