ڕێکاری ئەمنیی بۆ گەڕانەوەی خێزانە عێراقییەکانی کەمپی هۆل تەواو دەبێت

ئاڤا نیوز

شارەزایەکی ئەمنی نزیک لەحکومەتی عێراقەوە ئاشکرایکرد، بۆ گەڕاندنەوەی خێزانە عێراقییەکان لە کەمپی هۆل، حکومەت زۆربەی ڕێکارە ئەمنیی و کۆمەڵایەتییەکانی بۆ ئەو خێزانانە تەواوکردووە.

چیرۆکی سەرەکی: کەمپی هۆل دەکەوێتە پارێزگای حەسەکە لە ڕۆژئاوای کوردستان و ئیدارەی خۆبەڕێوەبەری سووریا (خۆسەر) سەرپەرشتی دەکات، نزیکەی 43 هەزار چەکداری پێشوو و ژن و منداڵی ئەندامانی داعش لەو کەمپە کۆکراوەتەوە، 18 هەزاریان عێراقین، بەغداش جەخت لە گەڕانەوەی هەموویان دەکاتەوە.

لێدوانی فەرمی: فازل ئەبو ڕغیف، شارەزای بواری ئەمنی ڕایگەیاند: 

- هەموو ئەو کەسانەی کە مەترسی ئەمنی و تایفەگەرییان لەسەر نییە، ڕێگەیان پێدەدرێت لەکەمپی هۆلەوە بگەڕێنەوە ناوچەکانی خۆیان، هاوکات ئەو کەسانەشی تێوەگلاون لە کردەوەی تیرۆریستی ڕەوانەی دەسەڵاتی دادوەری دەکرێن.

- ئەو خێزان و کەسانەی ئەو دوو مەرجە بۆ گەڕانەوەیان نایانگرێتەوە، لە کەمپی جەدعە لە پارێزگای نەینەوا یان لە کەمپەکانی دیکەدا نیشتەجێ دەکرێن تاوەکو دۆسیەکانیان یەکلادەبێتەوە.

- عێراق تەنیا هاووڵاتیانی خۆی دەگەڕێنێتەوە و بەرپرسیارێتی هیچ کەس و خێزانێکی بیانی هەڵناگرێت، پرۆسەکەش بەهاوکاری نەتەوە یەکگرتووەکانەوە بەڕێوەدەچێت.