چی لەبارەی ئەو مەرجەعەی شیعەکان دەزانیت کە سوودانی سەردانی کرد؟

ئاڤا نیوز

 

لە چەند ڕۆژی ڕابردوودا هەواڵی نەخۆشکەوتنی محەممەد ئیسحاق فەیاز یەکێک لە سێ مەرجەعە هەرە باڵاکەی نەجەف بڵاوبوویەوە، هەریەکە لە سەرۆککۆمار، سەرۆکوەزیرانی عێراق و بەشێک لە سەرکردە شیعەکان لە نەخۆشخانەیەکی بەغدا سەردانیان کرد و لە دۆخی تەندروستییان پرسی.

بۆچی گرنگە: محەممەد ئیسحاق فەیاز بە ڕەگەز ئەفغانیی (95 ساڵ) و بەشیر نەجەفی بە ڕەگەز پاکستانی (83 ساڵ) لەدوای عەلی سیستانی بە دوو ناسراوترین مەرجەعی شیعەکان لە نەجەف لە قەڵەم دەدرێن، تەنانەت هەندێک لە شیعەکان محەممەد ئیسحاق فەیاز بە جێگرەوەی عەلی سیستانی دەبینن، لەگەڵ ئەوەشدا بەهۆی نزیکی لە تەمەنی "سیستانی"یەوە و قورسە بتوانێت جێگەی بگرێتەوە، لە هەمان كاتیشدا فەرامۆشكردنیشی لە ڕكابەرییەكانی جێگرتنەوە هەر قورسە.

زانیاریی زیاتر: محەممەد ئیسحاق فەیاز یەکێکە لە سێ مەرجەعە باڵاکەی نەجەف و ساڵی 1930 لە پارێزگای غەزنی ناوەڕاستی ئەفغانستان لە دایکبووە، لە تەمەنی پێنج ساڵییەوە لە حەوزە ئاینییەکانی وڵاتەکەی خوێندوویەتی، دواتریش ساڵێک لە مەشهەدی ئێران درێژەی بە خوێندنی حەوزە داوە و پاشانیش هاتووەتە نەجەف.

 

ئەوەی پێویستە بیزانیت: لە نەجەفەدا مەرجەعی باڵا "ئایەتوڵڵا سیستانی"یە كە پلەی "عوزما"ی هەیە، جگە لەویش "ئایەتوڵڵا بەشیر نەجەفی"ی پاكستانی و "ئایەتوڵڵا محەمەد ئیسحاق فەیاز"ی ئەفغانی پەیڕەوكەریان هەیە، لە دەرەوەی ئەوانیش چەند وردەمەرجەعێكی دیكە هەن.