ڕێنمایی بۆ جێبەجێکردنی یاسای گەڕانەوەی زەوییەکان لە کەرکووک دەردەچێت

ئاڤا نیوز

 

وەزارەتی دادی عێراق ڕایگەیاند، لیژنەیەک بۆ جێبەجێکردنی یاسای گەڕانەوەی زەوییە کشتووکاڵییەکان بۆ خاوەنە ڕەسەنەکانیان لە پارێزگای کەرکووک پێکهێنراوە و لە شەش مانگی داهاتووشدا ڕێنمایی بۆ جێبەجێکردنی یاساکە دەردەکەن، جەختیش دەکاتەوە لەوەی نابێت ڕێگری لە جووتیاران بکرێت کار لە زەوییەکانیاندا بکەن ئەگەر هیچ ناکۆکییەکی یاسایی لەسەر نەبێت.

 

بۆچی گرنگە: دوای دوو ساڵ لە دواخستن، 21-1-2025 پەرلەمانی عێراق یاسای گەڕانەوەی زەوییە کشتووکاڵییەکانی بۆ خاوەنە ڕەسەنەکان پەسەندکرد کە داواکاری سەرەکی کورد بوو لە ناوچەکانی سنووری ماددەی 140 بە گشتی و پارێزگای کەرکووک بەتایبەتی، چونکە بەهۆیەوە ئەو زەویانەی جوتیارانی کورد کە بە بڕیاری حیزبی بەعس درابوون بە عەرەبی هاوردە، دووبارە بۆ خاوەنە ڕەسەنەکانیان دەگەڕێنرێتەوە.

 

لێدوانی فەرمی: ئەحمەد لعێبی، وتەبێژی وەزارەتی دادی فیدڕاڵ بۆ ئاژانسی فەرمی هەواڵی عێراقی ڕاگەیاند:

 

- لیژنەی تایبەت بە یاسای گەڕانەوەی زەوییە کشتووکاڵییەکان بۆ خاوەنە ڕەسەنەکانیان پێکهێنرا و یەکەمین کۆبوونەوەی ئەنجامدا، لە شەش مانگیشدا ڕێنمایی بۆ جێبەجێکردنی یاساکە دەردەکات.

- لیژنەکە زیاد تەمیمی، بریکاری وەزارەتی داد سەرپەرشتی دەکات، دیوانی چاودێریی دارایی، ئەمینداریەتی ئەنجوومەنی وەزیران و وەزارەتی کشتوکاڵیش ئەندامیان لە لیژنەکەدا دەبێت

- سەبارەت بە بڕیاری ساڵی 2012ی ئەنجوومەنی وەزیران بۆ هەڵوەشاندنەوەی ئەو گرێبەستە کشتووکاڵیانەی لەگەڵ جووتیارانی عەرەب کران لەگەڵ قەرەبووکردنەوەی ئەوانەی زیامەندبوون.

 

- لیژنەکە پێشنیازی کردووە هەر زەوییەک کێشەی یاسایی نەمابێت، ڕێگە بە هاووڵاتیان بدرێت کاری کشتووکاڵی خۆیانی تێدا بکەن.