ڕاوێژکارێکی سوودانی: پەیوەندییەکانی بەغدا و واشنتن ئەرێنین و هەماهەنگی بەردەوام هەیە

ئاڤا نیوز

 

ڕاوێژکارێکی سەرۆکوەزیرانی عێراق بۆ کاروباری سیاسی دەڵێت، بەدەرکردنی عێراق لە لیستی ئەو وڵاتانەی ئەمریکا پێدانی ڤیزایان لەسەر توند ناکات، نیشانەی ئەوەیە  کەشێکی ئەرێنی بەسەر پەیوەندییەکانیاندا زاڵە و هەماهەنگی بەردەوامیش هەیە.

 

چیرۆکی سەرەکی: وەزارەتی دەرەوەی ئەمریکا ڕەشنووسی پڕۆژەیەکی ئامادە کردووە بۆ دیاریکردنی وڵاتان بەسەر سێ ئاستدا بۆ پێدانی ڤیزا، لەو چوارچێوەیەشدا ڕێکارەکانی پێدانی ڤیزا بە هاووڵاتیانی 43 وڵات توندتر دەکرێن؛ عێراق یەکێک نابێت لەو وڵاتانە.

 

لێدوانی فەرمی: فەرهاد عەلائەدین، ڕاوێژکاری سەرۆکوەزیرانی عێراق بۆ کاروباری سیاسی دەڵێت: پەیوەندییەکانی واشنتن و بەغدا کەشێکی ئەرێنی بەسەریاندا زاڵە و هەماهەنگی بەردەوامیش هەیە، ئەوەش ڕەنگدانەوەی ئاستی پەیوەندییەکان و لێکتێگەیشتە هاوبەشەکانە لە سەرجەم بوارەکان.

 

زانیاریی زیاتر: "بەدەرکردنی عێراق لە توندکردنەوەی ڕێکارەکانی پێدانی ڤیزای ئەمریکی، نیشانەی بەهێزیی هەماهەنگی نێوان هەردوو وڵاتە و عێراق بەردەوام دەبێت لە بواری ڕووبەڕووبوونەوەی تیرۆر، بەهێزکردنی هاوبەشی هەرێمی و نێودەوڵەتی، بەردەوامی پەیوەندییەکانی لەگەڵ ئەمریکا بۆ بەدیهێنانی بەرژەوەندییەکانی گەلی عێراق". ڕاوێژکارەکەی سوودانی وادەڵێت.