تورکیا 300 مێگاوات کارەبای دیکە بۆ عێراق زیاد دەکات

 

ئاڤا نیوز

وەزیری کارەبای عێراق و وەزیری وزە و سەرچاوە سروشتییەکانی تورکیا ڕێککەوتن لەسەر زیادکردنی هاوردەکردنی کارەبا بە دوو هێندەکردنی بڕەکەی لە 300 مێگاواتەوە بۆ 600 مێگاوات لە تورکیاوە بۆ عێراق.

چیرۆکی سەرەکی: ڕۆژی یەکشەممە 2025-03-16، زیاد عەلی فازڵ، وەزیری کارەبای عێراق لە بەغدا پێشوازیی لە ئەڵب ئارسلان بایراکتار، وەزیری وزە و سەرچاوە سروشتییەکان و شاندی یاوەری کرد و گفتوگۆ کرا لەبارەی زیادکردنی بڕی کارەبای هاوردەکراو لە تورکیاوە بۆ عێراق. 

ئەوەی پێویستە بیزانیت: حکومەتی عێراق و تورکیا لە مانگی تەمموزی ساڵی ڕابردوودا سەرکەوتوو بوون لە کارپێکردنی هێڵی هاوبەشی کارەبا کە ئێستا 300 مێگاوات بۆ عێراق دابین دەکات.

ڕاگەیێنراوی فەرمی: بەگوێرەی ڕاگەیێنراوی وەزارەتی کارەبا، لە کۆبوونەوەکە وەزیری کارەبا ئاسۆی هاوکاری و هاوبەشی نێوان هەردوو وڵاتی لە بواری وزەدا خستەڕوو، بە تایبەتی لە کەرتی گواستنەوە و دابەشکردن و پەرەپێدانی تۆڕە کارەباییە هاوبەشەکان و هاوکات بانگهێشتنامەکەی بۆ کۆمپانیا تورکییەکانی تایبەتمەند لە بواری وزەی نوێبووەوە بۆ کارکردن لە عێراق نوێکردەوە.

٠ وەزارەتی کارەبا هەموو ئەو ڕێوشوێنە لۆجستی و ژێرخانیانەی تەواوکردووە کە پێویستن بۆ زیادکردنی توانای دابینکردن لە ڕێگەی هێڵی پەیوەندی عێراق و تورکیا بۆ 600 مێگاوات.

٠ پێشنیازی پێکهێنانی لیژنەیەکی تەکنیکی باڵای هاوبەش بۆ بەدواداچوون و جێبەجێکردنی بڕیارەکانی کۆبوونەوەکە درا.

٠ حکومەت کار بۆ جێبەجێکردنی ستراتیژییەتێکی یەکگرتوو بۆ هەمەچەشنکردنی سەرچاوەکانی وزە لەڕێگەی پاکێجێک لە پڕۆژەکانەوە دەکات کە بریتین لە بەستنەوەی تۆڕی کارەبا لەگەڵ وڵاتانی دراوسێ، پڕۆژەی وزەی خۆر.

لە لایەکی دیکەوە: وەزیری وزەی تورکیا ڕایگەیاند، لە چەند مانگی داهاتوو شایەتی دوو هێندەبوونی پێدانی کارەبا لە ڕێگەی هێڵی هاوبەشەوە دەبێت بۆ 600 مێگاوات.