بڕیارێکی نوێ لەبارەی مووچە دەردەکرێت

 

ئاڤا نیوز

خشتەی میلاكی سەرجەم مووچەخۆران بۆ ئەمساڵ لەلایەن ئەنجوومەنی وەزیران پەسەندکرا و بووە بڕیار و لەمەودوا کێشەی لیستی مووچە لەنێوان هەولێر و بەغدا نامێنێت.

چیرۆکی سەرەکی: خشتەی میلاكی سەرجەم مووچەخۆران لە کۆبوونەوەی ڕۆژی 5ـی شوباتی ئەمساڵ باس کراوە و سەرۆکوەزیران مەسرور بارزانی ئیمزای کردووە، نووسراوەکە 27ـی مانگی ڕابردوو لە ڕۆژنامەی وەقائیعی کوردستان بڵاوکراوەتەوە و ئەمڕۆ وەزارەتی داد بەفەرمی ڕایگەیاند.

زانیاریی  زیاتر: پەسەندکردنی خشتەکە لەسەر بنەمای میلاكی فیعلی مانگی یەکە کە هەردوو دیوانی چاودێری دارایی و وەزارەتەکانی دارایی کوردستان و عێراق لەسەری ڕێککەوتوون، لەم مانگەوە بەفەرمی دەبێت هەموو وەزارەت و فەرمانگەکان پێیەوە پابەند بن.

بۆچی گرنگە: ئەمساڵ لیستی مووچە وەکو خۆی دەبێت، چیتر لیستی مووچە نابێتە کێشە لەنێوان هەولێر و بەغدا، ناوی هیچ مووچەخۆرێک زیاد ناکرێت، دەرماڵە و سەرمووچە نابەسترێت لە هەندێک حاڵەتی تایبەت نەبێت، بۆنموونە فەرمانبەرێک لە مۆڵەت بگەڕێتەوە و تەرخانی دارایی بۆ کرابێت، یاخود فەرمانبەرێک خانەنشین بێت.