پەرلەمانی عێراق بەدواداچوون بۆ هۆکاری دواکەوتنی هەناردەی نەوتی کوردستان دەکات

ئاڤا نیوز

سبەی لیژنەی نەوت و غاز لە پەرلەمانی عێراق میوانداری بەرپرسانی وەزارەتی نەوتی فیدراڵ دەکات و لەهۆکاری دواکەوتنی دەستپێکردنەوەی هەناردەی نەوتی هەرێمی کوردستان دەکۆڵێتەوە.

ئەوەی پێویستە بیزانیت: ئێستا هەرێمی کوردستان، عێراق و تورکیاش بۆ دەستپێکردنەوەی هەناردەی نەوت لەڕێگەی بەندەری جەیهانەوە ئامادەن، بەڵام کۆمپانیا بیانییەکانی بەرهەمهێنەری نەوتی کوردستان مەرجیان هەیە و دەڵێن، پێویستە حکومەتی عێراق شایستە داراییەکانی پێشووتر و داهاتوویان بۆ خەرج بکات، ئەوەش تاکە گرفتی بەردەم دەستپێکردنەوەی هەناردەی نەوتە.

لێدوانی فەرمی: د.سەباح سوبحی، ئەندامی لیژنەی نەوت و گاز لە پەرلەمانی عێراق بە ئاڤا میدیای ڕاگەیاند:

- سبەی کاتژمێر 1:00ی دوانیوەڕۆ لیژنەکەمان میوانداری باسم محەممەد، بریکاری وەزارەتی نەوتی عێراق و شاندی تەکنیکی وەزارەتەکە دەکات.

- ئامانجمان لە کۆبوونەوەکە بەمەبەستی لێکۆڵینەوەیە لە هۆکاری دواکەوتنی دەستپێکردنەوەی هەناردەی نەوتی هەرێمی کوردستان.

- لە هەرێمی کوردستان و بەغدا بۆچوون و لێدوانی جیاوازمان گوێ لێدەبێت و ئێمەش وەکو ئەرکی پەرلەمانیمان، بەدواداچوون بۆ ئەو بابەتە دەکەین.

ئەمەش بزانە: بۆ چارەسەری کێشەکان، چەندجارێک شاندی وەزارەتی سامانە سروشتییەکانی حکومەتی هەرێمی کوردستان و کۆمپانیاکانی بەرهەمهێنانی نەوت (ئەپیکۆر) لەگەڵ وەزارەتی نەوتی فیدراڵ کۆبوونەتەوە، بەڵام تائێستا نەگەیشتوون بە ڕێککەوتن و زۆرینەی بەربەستەکان پەیوەندییان بە شایستە داراییەکانی ئەپیکۆرەوە هەیە.