پارتی و یەکێتی پۆستەکانی کابینەی 10 لەسەر سێ ستوون دابەش دەکەن

ئاڤا نیوز

ڕەشنووسی پێکهێنانی کابینەی 10 لەبارەی بەڕێوەبردنی حکومەت و دابەشکردنی دەسەڵاتەکان تەواو بوو، لەمەودوا پارتی و یەکێتی دێنە سەر دابەشکردنی پۆستەکان، پۆستەکان بەسەر سێ ستوون دابەش کراون و لەسەر ئەم بنەمایە بەپێی بەرکەوتەی هەڵبژاردن دابەش دەکرێن.

وێنە گەورەکە: پێکهێنانی کابینەی 10 گەیشتووەتە قۆناغی کۆتایی و تەنیا بڕیاردان لەسەر پۆستەکان ماوە،  پێشبینی دەکرێت دوای جەژنی ڕەمەزان پۆستەکانیش یەکلابکرێنەوە و حکومەتی نوێ بەسەرۆکایەتیی مەسرور بارزانی ڕابگەیێنرێت.

چیرۆکی سەرەکی: دوای کۆبوونەوەی ئەم هەفتەیەی سەرۆکوەزیران مەسرور بارزانی و بافڵ تاڵەبانی لەبارەی پێکهێنانی كابینەی 10 کە دووەم کۆبوونەوەیان بوو لەدوای هەڵبژاردن، شاندی دانوستاندنكاری پارتی دیموكراتی كوردستان و یەكێتیی نیشتمانیی كوردستان، ئێوارەی ڕۆژی سێشەممە 18-3-2025،  جارێکی دیکە لە مەکتەبی سیاسی یەکێتی لە هەولێر بۆ هەمان مەبەست کۆبوونەوە. بەپێی لێدوانی ئەندامانی شاندی هەردوولا، لە کۆبوونەوەکەدا کۆتاییان بە ئامادەکردنی ڕەشنووسی پێکهێنانی حکومەت هێناوە.


هەنگاوی داهاتوو: لەمەودوا پارتی و یەکێتی بەفەرمی دێنە سەر دابەشکردنی پۆستەکان، ئاڤا زانیویەتی پۆستەکان بەسەر سێ ستوون دابەش کراون و بەپێی ستوونەکان پۆستەکان یەکلایی دەکەنەوە:

ستوونی یەکەم: تایبەتە بە پۆستە سیادییەکان، هەرچوار سەرۆکایەتییەکە: هەرێم، حکومەت، پەرلەمان، ئەنجوومەنی دادوەری و جێگرەکانیان بۆ هەر چوار سەرۆکایەتییەکە.


ستوونی دووەم: وەزارەتە سیادییەکان لەخۆدەگرێت وەکو: ناوخۆ، پێشمەرگە، سامانە سروشتییەکان، دارایی، پلاندانان و ئەنجوومەنی ئاسایش.


ستوونی سێیەم: وەزەتە خزمەتگورزارییەکان و سەرۆکی دەستە و فەرمانگەکان لەخۆدەگرێت، وەکو: شارەوانی، تەندروستی، پەروەردە، خوێندنی باڵا، بارزگانی و پیشەسازی و ئەمانە لەگەڵ دەستەکان، دەستەی دەستپاکی، ژینگە، مافی مرۆڤ، ناوچە کوردستانییەکانی دەرەوەی ئیدارەی هەرێمی کوردستان، دەزگای من، دیوانی چاودێری دارایی و ئەمانە.