لیژنەی لێکۆڵینەوەی نێودەوڵەتی لەبارەی سووریا: جموجۆڵەکانی داعش زیادیکردووە

ئاڤا نیوز

سەرۆکی لیژنەی لێکۆڵینەوەی نێودەوڵەتی لەبارەی سووریا دەڵێت، جموجۆڵەکانی داعش زیادیکردووە، جەختیش دەکاتەوە کە بەردەوامی گرژییەکانی سووریا فراوانبوونی زیاتری ململانێکانی لە ئاستی ناوچەکەدا لێدەکەوێتەوە.

وێنە گەورەکە: لە دوای ڕووخانی دەسەڵاتی ئەسەد لە سووریا و لەگەڵ بەردەوامی گرژییەکان لە ناوخۆی وڵاتەکەدا، مەترسی سەرهەڵدانەوە و خۆڕێکخستنەوەی داعش زیاتر بووە، بۆیەش لە دوای ڕێککەوتنی نێوان هەسەدە و وەزارەتی بەرگری سووریادا بڕیاردراوە ئۆپەراسیۆنی هاوبەش دژی داعش دەستپێبکرێت.

لێدوانی فەرمی: پاوڵۆ بینیرۆ، سەرۆکی لیژنەی لێکۆڵینەوەی نێودەوڵەتی لەبارەی سووریا لە میانەی وتەیەکدا کە لە کۆبوونەوەی ئەنجوومەکانی مافەکانی مرۆڤ لە جنێڤ پێشکەشی کرد وتی:

٠ تائێستاش هەزاران ئەندامی داعش لە زیندانەکانی ژێر دەسەڵاتی هەسەدە دەستبەسەرن.

٠ هانی وڵاتان دەدەین ئەندامەکانی داعش وەربگرنەوە و دادگاییان بکەن.

٠ بەردەوامی گرژییەکانی سووریا بۆ فراوانبوونی ململانێکانی ناوچەکە زەنگی ئاگادار کردنەوەن، بۆ ئەوەش دەبێت شەڕ ڕابگرێت، چەک لەدەستی گرووپەکان دەربهێنرێت، ئاسایشی گشتی پارێزراوبێت و هێزە بیانییەکان لەو وڵاتە بچنە دەرەوە.

٠ حکومەتی نوێی سووریا کار بۆ بوونیادنانەوەی متمانە بکات و ڕێز لە هەمەڕەنگی کۆمەڵگای سووریا بگرێت.

٠ سزاکان هەڵبگیرێن و دووبارە ئاوەدانکردنەوەی سووریا دەستپێبکاتەوە.