یەکەم کاردانەوەی باخچەلی دوای دەستگیرکردنی ئەکرەم ئیمامئۆغلو

ئاڤا نیوز

 

دەوڵەت باخچەلی، سەرۆکی مەهەپە لە کاردانەوەی دەستگیرکردنی ئەکرەم ئیمامئۆغلو، سەرۆکی گەورە شارەوانی ئیستەنبووڵ دەڵێت، کۆماری تورکیا دەوڵەتێکی نەتەوەیی، یەکگرتوو، دیموکراسی و کۆمەڵایەتییە و بە سەروەری یاسا بەڕێوەدەبرێت.

 

چیرۆکی سەرەکی: بەرەبەیانی ئەمڕۆ، بە بڕیاری داواکاری گشتیی ئیستەنبووڵ، ئەکرەم ئیمامئۆغلو، سەرۆکی گەورە شارەوانی ئیستەنبووڵ و 106 کەسی دیکە کە سەرۆک شارەوانیی و چەند هونەرمەندێک و ئەندامانی جەهەپەی تێدایە، دەستبەسەرکران.

 
بڵاوکراوەی فەرمی: دەوڵەت باخچەلی، سەرۆکی مەهەپە لە تۆڕی کۆمەڵایەتی ئێکس ڕایگەیاند، دەسەڵاتی دادوەریی تورکیا سەربەخۆ و بێلایەنە. باخچەلی دەشڵێت، دژایەتیکردنی دادپەروەری و یاسا، یان تەنانەت دروستکردنی مشتومڕ لەسەر بڕیارێکی داواکاری گشتی، بانگهێشتکردنێکە بۆ دروستکردنی ژینگەیەکی پشێوی و توندوتیژی.

 

ئەوەی پێویستە بیزانیت: "هەموو مرۆڤێک لەسەر بنەمای یاسایی و ئینسانی و ئایینی یەکسانە، بەبێ گوێدانە ئەرک و پێگە و پۆست، هەموو کەسێک ماف و ئەرکی یەکسانی هەیە، هیچ کەسێک ناتوانرێت تووشی جیاکاری بکرێت، کەسیش خاوەنی باڵادەستی و ئیمتیازێکی ئایدیۆلۆژی، سیاسی یان ئابووری نییە".

 

ئەوەی ئێستا ڕوودەدات: ڕووداوی دەستگیرکردنی ئیمامئۆغلو و ئەندامانی جەهەپە، کاردانەوەی گەورەی لێکەوتووەتەوە، دۆخی تورکیا بەتایبەت ئیستەنبووڵ بەتەواوی گرژی تێکەوتووە، بەشێکی زۆری شەقامەکانی ئیستەنبووڵ و میترۆی ئیستەنبووڵ داخروان.