هێزێکی کوردستان لە مووسڵ و بەغدا ئۆپەراسیۆن دەکات

ئاڤا نیوز

هێزەکانی بەرەنگاربوونەوەی ماددە هۆشبەرەکانی کوردستان لە دوو ئۆپەراسیۆنی تایبەتدا لە مووسڵ و بەغدا 16 بازرگانی ماددە هۆشبەرەکان دەستگیر دەکەن و دەستیش بەسەر هەزار و 170 کیلۆ حەبی کاپتاگۆندا دەگرن.

وێنە گەورەکە: چەند ساڵێکی ماددە هۆشبەرەکان بوونەتە هەڕەشەی ڕاستەقینە لەسەر خەڵکی هەرێمی کوردستان، بەکارهێنان و بازرگانیکردن بەو ماددانە چەندین بەرامبەر زیادی کردووە. شەونخوونی و قارەمانێتی هێزەکانی بەرەنگاربوونەوەی ماددە هۆشبەرەکانیش نەبووایە ئێستا دەیان هێندە زیادی دەکرد.

چی ڕوویدا: زانیاری گەیشتووەتە هەولێر، هەندێک لە بازرگانەکانی تلیاک لەبەغداو لە موسڵەوە بەنیازن بڕێکی زۆر مادەی هۆشبەر بێننە کوردستان .

هێزەکانی بەرەنگاربوونەوەی ماددە هۆشبەرەکانی کوردستان ڕاستەوخۆ هەماهەنگی دەکەن لەگەڵ بەغداو مووسڵ، پلان دا دەنێن ئۆپەراسیۆنێکی هاوبەشی تۆکمە بکەن.

لەهەولێرەوە هێز بەرەو بەغدا بەڕێ دەکەوێت، شوێنی تلیاک و تلیاکچییەکان و بازرگانەکانیش دیاری دەکەن و ئۆپەراسیۆن لەچەند ناوچەیەکی بەغدا دەست پێدەکەن.

پێش هەمووشتێک سەرچاوەکانیان گرتووە، ئەوانەی کە تلیاکەکە دابەش دەکەن و دەیدەنە کەسانی ئالودە بوو  و منداڵە فەقیر. دواتر زانیاریان لێ وەردەگرن و یەکسەر هەڵمەت دەست پێ دەکەن بۆ دەستگیرکردنی بازرگانەکان و  ژمارەیەکیان دەستگیر دەکەن.

دووبارە هێز بەرەو موسڵ جوڵەی پێکراوە، لەوێش تاک تاکی ئەوانەیان دەستگیرکردووە زانیاریان لەسەر کۆکراوەتەوە لەسەر ئەو مەوادەی دەستی بەسەرا گیراوە.

ئەوەی پێویستە بیزانیت: لە هەردوو ئۆپەراسیۆنەکەدا 16 بازرگانی تلیاک دەستگیر کران، سیانیان، بیانی بوون.

لە بەغدا دەست گیراوە بەسەر تەن و نیوێک تلیاک. هەندێک لە مادەکانیش زۆر مەترسیداربوون، وەکو هیرۆیین، دوو کلیۆ دەستی بەسەرا گیراوە. 8 کیلۆ کریستاڵی شل، 34 کیلۆ کریستاڵی ڕەق، 50 کیلۆ حەبی ترامادۆڵ، تەنێک و 100 کیلۆ حەبی کاپتاگۆن.

زانیاری زیاتر: تیمەکانی بەڕێوەبەرایەتی نەهێشتنی ماددە هۆشبەرەکان لەچالاکیەکی دیکەدا توانیوویانە بڕی 45 کارتۆن دەرمان و حەبی ماوە بەسەرچوو و بێ ستیکەر کە بەشێوەی قاچاغ و نایاسایی هێنرابوونە ناو هەرێمی کوردستان دەستیان بەسەردا بگرن.