گەندەڵییەکی نوێ لە نەینەوا؛ چوار فەرمانبەر ساڵانێکە مووچەی 10 فەرمانبەری وەهمی وەردەگرن

ئاڤا نیوز

دەستەی دەستپاکی عێراق گەندەڵییەکی بەڕێوەبەرایەتی پەروەردەی پارێزگای نەینەوای ئاشکراکرد و ڕایگەیاند، ساڵانێکە چوار فەرمانبەری بەڕێوەبەرایەتییەکە، مووچەی 10 فەرمانبەری وەهمی وەردەگرن و لە نوێنەرایەتی پەروەردەی نەینەواش لە هەولێر، ئەو 10 کەسە وەک ئاوارە ناسێنراون کە لەو شارەدا کاردەکەن.

چیرۆکی سەرەکی: دەستەی دەستپاکی عێراق ئاشکرای کرد کە ئەو چوار فەرمانبەرە هەستاون بە خەرجکردنی مووچە بۆ 10 فەرمانبەر گوایە لە نوێنەرایەتی پەروەردەی نەینەوا لە پارێزگای هەولێر دەوام دەکەن، لەکاتێکدا دوای ئازادکردنی موسڵ ئەو فەرمانبەرانە بەفەرمی دەستیان بەکار نەکردووە و بەوهۆیەش دادگا بڕیاری لەدژییان دەرکردووە.

ڕاگەیێنراوی فەرمی: دەستەکە لە ڕاگەیێنراوێکدا ئاماژەی بەوەشکردووە، ئەو چوار فەرمانبەرە تۆمەتبارن بە دۆسیەی گەندەڵیی و بردنی مووچەی 10 فەرمانبەری وەهمی لە پەروەردەی پارێزگای نەینەوا، ئێستاش بەگوێرەی ماددەی 315 لە یاسای سزادان ڕاگیراون کە تایبەتە بە بردنی پارەی گشتیی و لێکۆڵینەوەیان لەگەڵ دەکرێت.

زانیاریی زیاتر: ئەو فەرمانبەرانە مانگانە لەپاڵ مووچەی خۆیان، دوو مووچە و نیوی دیکەشیان وەرگرتووە، واتە مووچەی 10 فەرمانبەرە وەهمییەکەیان بەسەر خۆیاندا دابەشکردووە، بەکۆی گشتیش هەرکامێکیان مانگانە سێ مووچە و نیویان  وەرگرتووە.