ئەمریکا و ئیسرائیل سەبارەت بە ئێران کۆدەبنەوە

ئاڤا نیوز

ئاژانسی هەواڵی ئاکسیۆس، لە چەند سەرچاوەیەکی باڵادەستی ئەمریکی و ئیسرائیلییەوە بڵاوی کردەوە، ئەمریکا و ئیسرائیل هەفتەی داهاتوو لە کۆشکی سپی گفتوگۆ ستراتیژییەکانیان سەبارەت بە بەرنامە ئەتۆمییەکەی ئێران دەستپێدەکەن.

وێنە گەورەکە: بە گوێرەی میدیاکان، پێشتر دۆناڵد ترەمپ، سەرۆکی ئەمریکا، لە ڕێگەی نامەیەکەوە بۆ عەلی خامنەیی، ڕێبەری باڵای ئێران، مۆڵەتێکی دوو مانگی بەو وڵاتە داوە تا بێتە سەر مێزی گفتوگۆ و سەبارەت بە بەرنامە ئەتۆمییەکەی دانوستان بکات. هاوکات ترەمپ هەڕەشەی ئەوەشی تێدا کردووە، ئەگەر ڕێککەوتنێک لەو بارەیەوە نەیەتە ئارا، ئەوا بژاردەی سەربازی لە دژی بەرنامە ئەتۆمییەکەی ئێران ڕەچاو دەکرێت. 

لەلایەکی دیکەوە: بنیامین نەتانیاهۆ، سەرۆکوەزیرانی ئیسرائیل لەو باوەڕەدایە، ئەگەری گەیشتن بە ڕێککەوتن لەگەڵ ئێران زۆر لاوازە، بۆیە دەیانەوێت بە هاوئاهەنگیی لەگەڵ ئەمریکا پلانی هێرشێکی سەربازیی هاوبەش دابڕێژێن تا لە ئەگەری زیادبوونی گرژییەکان و پێکدادانی سەربازی، جێبەجێی بکەن.