لە سووریا دەست بەسەر 3 ملیۆن حەبی کەپتاگۆندا دەگیرێت

ئاڤا نیوز

لە کۆگایەکی شاری حەلەب دەست بەسەر بڕێکی زۆر حەبی کەپتاگۆندا گیرا، کە یەکێکە لەو حەبە هۆشبەرانەی لەسەردەمی بەشار ئەسەددا لە وڵاتەکەدا بە بەرفراوانی بەکاردەهات و بەرهەمدەهێندرا.

وێنە گەورەکە: لە سەردەمی دەسەڵاتی بەشار ئەسەد، سووریا ببوو بە ناوەندی بەرهەمهێنانی حەبی کەپتاگۆن و لەوێوە ڕەوانەی وڵاتانی دیکەی عەرەبی دەکرا، لەم بوارەشدا حکومەت بە کارئاسانیکردن بۆ بەرهەمهێنانی ئەو ماددە هۆشبەرە تۆمەتبار دەکرا.

ڕاگەیێنراوی فەرمی: وەزارەتی ناوخۆی سووریا لە ڕاگەیەندراوێکدا لە تۆڕی کۆمەڵایەتی فەیسبووک بلاویکردووەتەوە، فەرمانگەی ڕووبەڕووبوونەوەی ماددە هۆشبەرەکان بە هەماهەنگی لەگەڵ بەڕێوبەرایەتی ئاسایشی حەلەب ئۆپەراسیۆنێکی سەرکەوتوویان ئەنجامداوە و دەستیان بەسەر یەکێک لە فرۆشیارانی حەبی کەپتاگۆندا گرتووە.

زانیاریی زیاتر: لە ئۆپەراسیۆنەکەدا نزیکەی سێ ملیۆن حەبی هۆشبەر لە کۆگایەکدا دەستی بەسەردا گیراوە و پەڕاوی لێکۆڵینەوە بەرامبەر بە تۆمەتباران کراوەتەوە و ڕووبەڕووی دادگا دەکرێنەوە.