سوننەكان عیساوی بۆ سەرۆكی پەرلەمانی عێراق بەربژێر دەكەن

ئاڤا نیوز

سێ هاوپەیمانێتی سوننەکانی عێراق (سیادە، عەزم، حەسم) سالم عیساوی بۆ پۆستی سەرۆکی پەرلەمانی عێراق بەربژێر دەکەن، دوای ئەوەی محەممەد حەلبووسی بە بڕیاری دادگەی فیدراڵی عێراق دوورخرایەوە.

ئەوەی پێویستە بیزانیت: دیاریکردنی سالم عیساوی پاش کۆبوونەوەی چڕ و درێژخایەنی شەوی هەینی لەسەر شەممەی سوننەکان بوو، دواجار لەسەر بەربژێرکردنی عیساوی بۆ سەرۆکی پەرلەمانی عێراق گەیشتنە ڕێککەوتن.

زانیاریی زیاتر: سوننەکان لە نوسراوێکدا کە ئاڕاستەی چوارچێوەی هەماهەنگی شیعەکانیان کردووە و هەرسێ سەرکردەکەیان (خەمیس خەنجەر، موسەنا سامەڕائی، سابت عەباسی) واژۆیان کردووە، زانیارییان لەبارەی سالم عیساوی نووسیوە و داواشیان کردووە پەلە بکرێت لە ڕێکخستنی دانیشتنی پەرلەمانی عێراق بۆ ئەو مەبەستە.

باکگراوند: سەرۆکایەتی پەرلەمانی عێراق لە 21 ی تشرینی دووەمی 2023 کۆتایی بە ئەندامیەتی محەممەد حەلبووسی هێنا، دوای ئەوەی دادگەی فیدراڵی عێراق کە "باڵاترین دەسەڵاتی دادوەرییە" لە عێراق لە تشرینی دووەمی 2023 لەسەر سکاڵایەکی پەرلەمانتار لەیس دلێمی کۆتایی بە ئەندامیەتی حەلبووسی لە پەرلەمانی عێراق هێنا، لەیس، حەلبووسی بە ساختەکردنی نوسراوی دەستلەکارکێشانەوەی تۆمەتبارکردبوو.

بۆچی گرنگە: لەوکاتەوەی حەلبووسی لە سەرۆکی پەرلەمانی عێراق دوورخراوەتەوە، پەرلەمانی عێراق بێ سەرۆکە و زۆرێک لەو بابەتانەی پەیوەستن بە ژیانی خەڵکەوە دانیشتنیان لەبارەوە نەکراوە.