حووسییەکان بارەگایان لە بەغدا دادەخەن "بەغدا لە مەترسی دایە"

ئاڤا نیوز

حووسییەکان لەسەر داوای گرووپە چەکدارەکانی عێراق بارەگایەکی "ستراتیژی"ـیان لە بەغدا داخستووە، هاوکات بەرپرسێکی باڵای ئێرانی هۆشداریی داوە، ئەگەری هەیە عێراق بکرێتە ئامانج لە لایەن ئەمریکاوە.

وێنە گەورەکە: دوای هێرشەکانی ئەمریکا بۆ سەر پێگە و بارەگاکانی حووسییەکانی یەمەن، گرووپە چەکدارەکانی عێراق فشار لەو گرووپە دەکەن چالاکییان لە عێراق کەمبکەنەوە و بارەگاکانیان داخەن.

زانیاریی بەدەستهاتوو: چەند سەرچاوەیەک بە ڕۆژنامەی "شەرقولئەوسەت"ـیان ڕاگەیاندووە، گرووپی چەکداریی حووسیی یەمەنی بارەگایەکی ستراتیژییان لە ناوەڕاستی بەغدا داخستووە، ئەوەش لەسەر داوای گرووپێکی چەکداریی شیعی بووە.

سەرچاوەکان ئەوەشیان دووپات کردەوە، لە ئەنجامی زیادبوونی فشارەکانی هاوپەیمانیی چوارچێوەی هەماهەنگی، ئەگەری هەیە حووسییەکان دوو بارەگای دیکەش لە بەغدا و شارێکی دیکە لە باشووری ئەو وڵاتە دابخەن.

قووڵتر: لە هەفتەی ڕابردوو، ئیسماعیل قائانی، فەرماندەی سوپای قودسی سەر بە سوپای پاسدارانی ئێران بە نهێنی سەردانی بەغدای کردووە،  چاوی بە سەرکردەکانی چوارچێوەی هەماهەنگی و گرووپە چەکدارەکان کەوتووە و داوای لێکردوون، هیچ چالاکییەکی نەکەن ئەمریکا و ئیسرائیل توڕە بکات و دۆخەکە "هەستیارە"، هاوکات هۆشداریی داوە کە ئەگەری هەیە ئەمریکا هێرش بکاتە سەر گرووپە چەکدارەکانی عێراق.

لە لایەکی دیکەوە: ئۆپەراسیۆنە هاوبەشەکانی عێراق ئەمڕۆ هەینی، لە ڕاگەیێنراوێکدا، ئەو دەنگۆیانەی ڕەتکردەوە گوایە حووسییەکان سەربازگەیەکی ڕاهێنانیان لە ناوچەی خاڵس لە پارێزگای دیالە بەکارهێناوە و بوونی لەو ناوچەیە هەبووبێت.

ئەوەی پێویستە بیزانیت: لە چەند ڕۆژی ڕابردوودا، ئەمریکا چەندین هێرشی ئاسمانیی کردە سەر سەنعای پایتەختی یەمەن و پارێزگاکانی سەعدە، بەیزا و جۆف و پێگەی حووسییەکانی کردە ئامانج.