سوپای سوودان لەکۆنترۆڵکردنی تەواوی خەرتووم نزیکدەبێتەوە

ئاڤا نیوز

 

بەپێی بڵاوکراوەی سەرچاوە سەربازییەکان، سوپای سوودان نزیکبووەتەوە لەکۆنترۆڵکردنی تەواوی خەرتوومی پایتەخت و هێزەکانی پشتیووانی خێراش لەپاشەکشەدان. 

 

چیرۆکی سەرەکی: شەڕی چەکداری لە سوودان لە نیسانی ساڵی 2023ـەوە لە نێوان سوپا و هێزەکانی پشتیوانی خێرا دەستیپێکردووە و بەردەوامە، بەپێی ڕاپۆرتە ناوخۆیی و نێودەوڵەتییەکان لە ئەنجامی ئەو شەڕەی تاوەکو ئێستا درێژەی هەیە، زیاتر لە 20 هەزار کەس گیانیان لەدەستداوە و نزیکەی 14 ملیۆن کەسی دیکەش ئاوارەبوون.

 

زانیاریی بەدەستهاتوو: بەرەبەیانی ئەمڕۆ شەممە 22-3-2025  سوپای سوودان، هەریەکە لە بانکی ناوەندی و تاوەرەکانی کۆمپانیاکانی پەیوەندی و بانکی سەحل و سەحرای کۆنترۆڵکردووەتەوە.

 

ڕاگەیێنراوی فەرمی: سوپای سوودان لە بەیاننامەیەکدا ڕایگەیاند: هێزەکانی سوپا کۆشکی سەرۆکایەتیی وڵاتەکە و سەرجەم وەزارەتەکانی ناوەندی پایتەختیان کۆنترۆڵکردووەتەوە.

 

لەلایەکی دیکەوە: زافر عومەر، فەرماندەی ناوچەی سەربازی ئومدەرمان ئاشکرایکرد، هێزەکانی سوپا گەڕەکەکانی نەخیل، بوستان و ئوم بەدەتسەبیلیان لە ڕۆژئاوای ئومدەرمان لە هێزەکانی پشتیوانی خێرا پاککردەوە.

 

باکگراوند: هێزی پشتیوانی خێرا هەزاران ئەندامی هەیە و مێژووی دروستبوونی دەگەرێتەوە بۆ سەردەمی ڕژێمی پێشووی سوودان، ئامانج لە دروستبوونی ڕووبەڕبوونەوەی یاخیبووانی دارفۆر بوو لەسەر سنوورەکانی ئەو وڵاتە.