بەغدا مانگی داهاتوو دەست بە خەرجکردنی 12 مووچەکەی خانەنشینان دەکات

ئاڤا نیوز

 

لە لیستی مووچەی مانگی سێ ناوی نزیکەی چوار هەزار خانەنشینی نوێ و میراتگر تۆمار کراوە و بە دوو لیست ڕەوانەی بەغدا کراون، لەگەڵ مووچەی مانگی سێ، سێ مووچە بەیەکەوە وەردەگرن و بەشێکیشیان دوای جەژن 12 مووچەکەی ئیکرامییەیان بۆ خەرج دەکرێت.

 

وێنە گەورەکە: کێشەی هاوتاکردنی مووچەی خانەنشینان لەگەڵ عێراق و چارەسەرکردنی کێشەکانیان قۆناغی باش چووەتە پێشەوە، ڕۆژانە سەدان مامەڵەی خانەنشینانی نوێ ئاڕاستەی بەڕێوەبەرایەتیی گشتیی خانەنشینی دەکرێت بۆ ئەوەی بخرێنە نێو لیستی مووچەی مانگەکانی داهاتوو و سەرجەم ئەو مانگانەش لەگەڵی وەرگرن کە بەهۆی پرۆسەی خانەنشینبوونیان وەریان نەگرتووە.

 

 

چیرۆکی سەرەکی: ئەو خانەنشینانەی ئەم مانگە مووچەیان بۆ بەستراوە بەشێکیان ئەوانەن لە مانگەکانی ڕابردوودا کێشەی 'یو پی ئێن – میراتگر' یان هەبوو، لەگەڵ ئەم مانگە دۆسیەی دوو هەزار و 400 کەسیان چارەسەر کراوە.

 

لێدوانی فەرمی: سەرچاوەیەک لە بەڕێوەبەرایەتیی گشتیی خانەنشینی هەرێمی کوردستان بە ئاڤای ڕاگەیاند، "بە دوو لیستی جیا ناوی ئەو چوار هەزار کەس ڕادەستکراوە، یەکێکیان ئەوانەی کێشەی یو پی ئێن و میراتگریان هەبووە لەگەڵ خانەشینانی نوێی ئەوانەی کە سەرەتای ئەمساڵ خانەنشین بوون و مووچەیان وەرنەگرتووە."

 

- سەرووی هەزار و 500 کەس لە خانەنشینانی نوێ بە لیستێکی جیا ڕادەستی وەزارەتی دارایی عێراق کراوە، ئەوانەن کە 12 مووچەکەی ئیکرامیە دەیانگرێتەوە، دوای جەژن پارەکانیان بۆ خەرج دەکرێت و وەریدەگرن، ئەوانەن کە 25 ساڵ خزمەت و 180 ڕۆژ مۆڵەتیان هەیە."

 

- ئەوانەی کێشەی یوپێ ئێنیشیان هەبووە، مووچەی ئەو مانگانەش وەردەگرن کە بۆیان خەرج نەکراوە و بەهۆی ئەو کێشەیەوە ڕاگیرابوو.