کۆبوونەوەی پەرلەمانی عێراق لەسەر بەپارێزگابوونی هەڵەبجە جارێکی دیکە دواخرا

ئاڤا نیوز

کۆبوونەوەی پەرلەمانی عێراق لەبارەی دەنگدان بە پڕۆژەیاسای بەپارێزگابوونی هەڵەبجە جارێکی دیکە دواخرا.

چیرۆکی سەرەکی: بڕیار بوو کاتژمێر 08:00 ی ئەمشەو پەرلەمانی عێراق لەبارەی چەند پرسێک کۆببێتەوە، گرنگترینیان دەنگدان بوو بە پڕۆژەیاسای بەپارێزگابوونی هەڵەبجە و پڕۆژەیاسای حەشدی شەعبی، بەڵام دوای تێپەڕبوونی دوو کاتژمێر ڕێژەی یاسایی ئامادەبووان تەواو نەبوو، بەم هۆیەوە دانیشتنەکە بۆ کاتێکی نادیار هەڵگیرا.

لە پەیامنێرەوە: دەروون مەلا ناجی، پەیامنێری ئاڤا لە پەرلەمانی عێراق ڕایگەیاند، ئەمشەو تەنیا 123 پەرلەمانتار واژۆی ئامادەبوونیان کرد، ئەمە لەکاتێکدایە ڕێژەی یاسایی پێویستی بە 167 پەرلەمانتارە.

باکگراوند: دووەم شەوی لەسەریەکە دانیشتنی پەرلەمانی عێراق لەبارەی هەڵەبجە ناکرێت، شیعە و سوننەکان ڕێگریی لە تێپەڕاندنی یاسای بەپارێزگابوونی هەڵەبجە دەکەن،  داوا دەکەن هەندێک قەزای عێراق بەیەک پاکێج لەگەڵ هەڵەبجە بکرێنە پارێزگا، کوردیش یەک دەنگ ئەمە ڕەت دەکاتەوە و  فراکسیۆنە کوردستانییەکان دەڵێن، هەڵەبجە تایبەتمەندیی خۆی هەیە و قبووڵی ناکەن ئەو پڕۆژەیە بە گۆڕانکاری کارگێڕی دیکە ببەسترێتەوە.

ئاڤا قسەی لەگەڵ سەرجەم فراکسیۆنە کوردستانییەکان کرد (پارتی، یەکێتی، نەوەی نوێ، یەکگرتوو و کۆمەڵ) هەموویان جەختیان کردەوە لەسەر پرس و دۆزە نیشتمانییەکان کۆدەنگ و یەک بڕیارن، لە داهاتوودا بەشداریی هیچ دانیشتنێکی داهاتووی پەرلەمان ناکەن، ئەگەر پڕۆژەیاسای بەپارێزگابوونی هەڵەبجەی تێدا نەبێت.