بەرنامە و سیستمی نوێی گەشتیاریی لە هەرێمی کوردستان پەیڕەو دەکرێت

 

 

ئاڤا نیوز

 

هەرێمی کوردستان بۆ پێشوازیکردن لە گەشتیاران سیستمی نوێ پەیڕەو دەکات، وتەبێژی دەستەی گەشتوگوزار لەمبارەیەوە دەڵێت 'لەسەر دوو ئاست ئامادەکاریمان بۆ جەژنی ڕەمەزان کردووە'.

چیرۆکی سەرەکی: ساڵانە لە بۆنە ئاینی و نەتەوایەتییەکاندا ژمارەیەکی زۆر گەشتیار ڕوو لە هەرێمی کوردستان دەکەن، لەپێناو دابینکردنی کەشێکی ئارام بۆ گەشتیاران، لە هەموو ڕوویێکەوە یەکە ئیداری و ئەمنییەکان ئامادەکاری بۆ پێشوازیکردن لە گەشتیار دەکەن.

لێدوانی فەرمی: ئیبراهیم عەبدولمەجید، وتەبێژی دەستەی گەشتوگوزاری هەرێمی کوردستان، بە ئاڤا میدیای ڕاگەیاند: لەسەر ئاستی گشتیی هەماهەنگی لەنێوان دەستە و بەڕێوەبەرایەتییەکانمان لەگەڵ لایەنە پەیوەندیدارەکان بەتایبەت ئاسایشی بازگەکان و وەزارەتی ناوخۆ هەیە، هەروەها لیژنە بۆ بازگەکان و ناو شارەکان و بەسەرکردنەوەی شوێنە گەشتیارییەکان پێکهێنراوە.

زانیاریی تایبەت: لەسەر ئاستی تایبەت دەستەی گەشتوگوزار لەگەڵ کۆمەڵەی چێشتخانە و میوانخانەکان کۆبوونەوەی کردووە، سەرجەم شوێنە گەشتیارییەکان لە ڕۆژانی جەژن و پشوودا کراوە دەبن.

زانیاریی زیاتر: دەستەی گەشتوگوزار هەشت ژمارەی پەیوەندی وەکو هێڵی گەرم لە چوار پارێزگا و چوار ئیدارە سەربەخۆکان دەخاتە کار، بۆ ئەوەی لە هەر ڕووداوێکی نەخوازراو گەشتیار پەیوەندیان پێوە بکات.

ئەوەی پێویستە بیزانیت: دەستەی گەشتوگوزار کار لەسەر بەرنامە و پلانێکی نوێ بۆ کۆکردنەوەی داتای ورد لەسەر گەشتیارەکان دەکات، بۆ ئەوەی بزانێت گەشتیار حەز بە چ جۆرە گەشتوگوزارێک دەکات و خەڵکی چ وڵاتێکە و چەند پارە خەرج دەکات، لەسەر ئەم پێوەرە سیستمی نوێی گەشتیاری دادەنرێت.